Марија од Радовиш 10 години е во количка: „Не дозволив тоа да ми е пречка во животот - возам АТВ, магистрирав, имам успешни бизниси“

Детали

недела, 11 февруари 2024

„Мобилноста ја изгубив како последица на тешка сообраќајна несреќа. Пред повредата ги сакав моторите, возев мал скутер. Денес возам и АТВ, си го купив со желба за поголема слобода и го користам за да поминам време во природа со моите кучиња“, вели Марија од Радовиш која 10 години е во количка, но не дозволува тоа да ја запре да ужива во животот.

Марија Ристова (26) од Радовиш е дипломиран правник и магистер по казнено право. Таа има свој мал бизнис за колачи и слатки, а е и единствената жена во земјава која е регистриран одгледувач на кучиња од расата шарпланинец.

Оние кои ја познаваат, но и луѓето кои ја следат на социјалните мрежи постојано ја гледаат ведра и расположена, полна со елан и живот. Таква е и во реалноста, но многумина, сепак, не знаат дека Марија околу 10 години е количка...

И покрај тоа, Марија вози АТВ и ужива во секој миг во животот.

„Да се биде во количка не е ништо невообичаено, само бара пристап на нештата од поразличен агол и на поразличен начин.

Вистина е дека не можам да одам, но ги чувствувам и движам и двете нозе. Ова е малку покомплицирана тема, но тоа е накратко“.

За предизвиците со кои се соочува, но и за успесите кои ги постигнува на многу полиња, таа ни раскажа во интервјуто за CRNOBELO.com:

Како се чувствуваше по несреќата, кога дозна дека веќе нема да можеш да одиш?

Искрено, не знам како се чувствував. Веројатно беше моментален шок и неверување.

Потоа следуваше прифаќање на ситуацијата и помирување со неа. Но, и благодарност на Бога што сум жива и имам шанса да се борам.

Инаку, мобилноста ја изгубив како последица на тешка сообраќајна несреќа каде што најмногу бев повредна јас.

А, што ти беше мотив, што ти даде сила да продолжиш и да почнеш да живееш исполнет „втор живот“?

Мотив да продолжам напред ми е мојата фамилија која секогаш ме поддржувала во сè и беше до мене во тие најтешки моменти, пријателите кои не ме напуштија и мојата желба за живот.

Сметам дека сум потенцијал кој има што да покаже без разлика на сè што се случило.

По повредата, јас имав уште една година од средно и требаше да ја завршам. Положив матура и се запишав на факултет.

Денес сум магистер по право од областа на казнените науки.

Во првите години од моето студирање се роди и мојот прв мал бизнис, путер колачите кои се доста популарни кај нас веќе осум години.

Успехот со колачињата ми е преубава приказна - луѓето ги обожаваат, а јас сум им благодарна на таа доверба. И во сето тоа ми помагаат моите.

Продолжува на следната страница...