Гоце Тодевски бесплатно потстрижува бездомници: „Нивните реакции се бесценети, очи полни солзи и благодарност“

Детали

среда, 20 март 2024

„Работата со деца е дел од мојата професија во кој посебно уживам. Тие зрачат со посебна енергија, топлина и нивното потстрижување воопшто не е стресно. Прво се запознаваме, си играме, а дури тогаш се шишаме“, вели фризерот Гоце Тодевски за CRNOBELO.com.

Фризерот Гоце Тодевски (32) од Скопје неодамна привлече внимание на социјалните мрежи, откако објави видео на кое потстрижува момче кое ја донираше својата долга коса за детски перики.

По објавувањето на видеото Гоце добил многу позитивни коментари, а му се јавиле и други луѓе кои ја понудиле својата коса за изработка на перики.

Но, овој млад фризер е познат и по тоа што пред неколку години иницираше акција за потстрижување на бездомните лица во Скопје и тоа го правеше бесплатно, за барем малку да им го разубави тешкото секојдневие.

Во разговор за CRNOBELO.com, Гоце ни раскажа за оваа иницијатива, како изгледа кога треба да потстрижи мало дете што не седи мирно, но и кои ќе бидат трендовите за фризури оваа пролет:

Неодамна го потстрижа малиот Ѓурчин, кој ја донираше својата долга коса за да се изработат перики за деца болни од рак. Дали кога дојдоа во твојот салон неговите родители ти кажаа која им е идејата? И како реагираше тој на својата нова фризура?

Да, секако дека знаев која е намерата на момчето кое цели 6 години ја чуваше и негуваше својата коса за да си ја оствари замислената цел.

Ѓурчин беше многу изненаден од сликата која ја виде во огледало. Знаеме колку е шокантно кратењето долга коса за секого, без разлика дали е дете или возрасен.

Но, по неколку минути беше пресреќен и задоволен, бидејќи конечно ја оствари целта што си ја зацрта, а тоа може да се види и од неговата насмевка.

Какви реакции предизвика видеото во јавноста? Се јавија ли и други што сакаат да донираат коса?

Да, се јавија и други за донирање коса од која би се изработиле перики за лица болни од канцер.

Ова за мене е дополнителен поттик да го забрзам проектот на кој работам, а за кој сите ќе дознаете за некое време.

Соработуваш ли со некого во однос на донациите на коса? Има ли кај нас многу луѓе кои изработуваат перики?

Да, соработувам со Сашка Кузманова од Кавадарци која е директно инволвирана во процесот на изработка на периките.

Продолжува на следната страна...