Матеа од Македонија и Ејдан од Англија се венчаа на Бали: „Наместо да трошиме многу пари за една ноќ, отидовме на патување“

Детали

недела, 16 јуни 2024

„Кога кажавме дека се откажуваме од големата свадба, нашите родители беа среќни за нас, но малку разочарани, бидејќи сакаа да се запознаат во живо. Мајката на сопругот беше прва која нè охрабри да правиме тоа што сакаме и покрај тоа што не беше воопшто традиционално“, раскажува Матеа од Кавадарци за бајковитата венчавка на Бали со сопругот Ејдан од Англија.

Матеа од Кавадарци и сопругот Ејдан, кој е од Англија, живеат во Софија, Бугарија.

Откако им станало јасно дека организирањето традиционална (голема) свадба ќе биде практично невозможно бидејќи семејствата и пријателите им се од различни земји, решиле да се венчаат „по свои правила“.

Парите кои би ги потрошиле на голема свадба, ги искористиле за патување во Бали, каде што и се венчале.

Секако, организирале и мала прослава за најблиските во родното Кавадарци на Матеа.

Матеа ни раскажа како се запознале со сопругот, кога ја запросил, но и како и зошто се одлучиле за венчавка на Бали:

„Живеам во Софија, Бугарија веќе 11 години. Дојдов да студирам и останав, заради слободата и можностите што големиот град ги нуди.

Сопругот е од Англија и фирмата каде што работеше отвори претставништво во Софија и тој бил еден од избраните да помогне со разработувањето.

Се запознавме пред околу 6 години на мојот прв ден на работа — тој ја водеше обуката и тимот во тој период.

Не би кажала дека беше љубов на прв поглед, но имав чудно чувство дека го познавам од некаде. Ни требаше околу една година да разбереме дека не можеме еден без друг и да почнеме врска.

Почнавме да живееме заедно речиси веднаш, и оттогаш сме преминале низ многу работи. Ме побара за жена кога бевме на летен одмор на Крф пред 2 години.

По вечерата, се шетавме на плажа, бевме само јас, тој и природата околу нас.

Не беа потребни никакви декорации — ѕвездите блексаа премногу силно, а шумолењето на морските бранови и нежниот вечерен ветер помогнаа за романтичната атмосфера“.

Наместо да потрошат многу пари на една ноќ, Матеа вели одлучиле дека е подобро да отидат на патување и таму да го кажат судбоносното да.

„Првично сакавме да правиме поголема свадба во винарија близу Кавадарци, со гости од Македонија, Англија, Бугарија, САД...

Бидејќи сами ја финансиравме забавата, решивме дека тие средства може да се искористат подобро, отколку да се потрошат за една ноќ.

Исто така, и транспортот за гостите од странство ни претставуваше проблем, па сопругот даде идеа да отидеме некаде настрана.

По неколку денови барање локации на интернет, се одлучивме за Бали. Кога бев мала го гледав филмот ’Јади, моли се и уживај‘ и се заљубив во местото, па одлуката беше лесна.

Кога кажавме дека се откажуваме од големата свадба, нашите родители беа среќни за нас, но малку разочарани, бидејќи сакаа да се запознаат и забавуваат во живо.

Мајката на сопругот беше прва која нè охрабри да правиме тоа што сакаме, и покрај тоа што не беше воопшто традиционално.

За Бали одлучивме да одиме само двајцата, заради тоа што сме од различни држави, а живееме во сосем трета и пак се појави проблемот со транспорт за други лица, особено бидејќи за Македонци треба виза.

Кажавме само на многу мал број луѓе, сакавме да си е само наш ден, пред да го споделиме со сите пријатели.

Организацијата на венчавката беше многу лесна. Во денешно време навистина има сè на интернет и сè лесно се наоѓа и верифицира.

Во декември стапивме во контакт со свадбена агенција (Bali Moon Wedding), тие ни испратија листа со локации низ островот (околу 30), вид на декорации и фотографи.

Како и секој човек што користи социјални мрежи, ако нешто ми се допаѓа, или најдам место каде што сакам да одам, си го зачувувам, со надеж дека еден ден може да се оствари, независно колку нереално да е во моментот.

Точно 4 години пред денот на свадбата, видов слика од хотел во Бали на Инстаграм и му ја пратив на сопругот.

Кога го видовме истиот хотел во листата од агенцијата, го сфативме како знак и закажавме дата за јуни.

Секој месец до свадбата имавме онлајн кореспонденција со членови од агенцијата, кои грижливо нè прашуваа дали имаме се подготвено и закажано (билети, визи, сместување).

Еден ден пред свадбата, се сретнавме со член од агенцијата, којшто ни кажа чекор по чекор како ќе се одвива настанот. На овој состанок избравме и песни за одењето до олтарот и првиот бакнеж, и им пратив примери за шминка и фризура.

Бали е познат по изработката на сребро, па во истиот ден сопругот си купи бурма од локален производител на сребро.

На денот на свадбата имавме организиран трансфер од сместувањето до хотелот. Хотелот се вика The Kayon Jungle Resort, сместен е помеѓу оризови тераси во Убуд, централниот дел на островот“.

Продолжува на следната страница...