Љубовната приказна на Бојан Велевски и Каролина: „Се запознавме во диско - таа го викала келнерот, јас мислев ми наздравува“

Детали

понеделник, 14 јули 2025

„Таа вечер не требаше да одам во диско. Не требало ни Каролина да оди, непланирано е и таа таму. Во еден момент се врти и бара уште една пијачка од келнерот кој е зад мене... јас мислам мене ми наздравува и за една минута се бутам низ гужва, одам да ѝ пријдам. На крај завршивме со бакнеж и танц на песна од Тоше“, вели за запознавањето со сопругата, комичарот Бојан Велевски.

Стенд-ап комичарот Бојан Велевски (37) долги години ужива во љубовта со сопругата Каролина (34).

Освен синот Војдан и многуте заеднички интереси кои ги имаат, нив, на некој начин, ги поврзува сличната и работа.

Бојан, кој освен што е актер и стенд-ап комичар, работи во полето на маркетингот, а често е ангажиран и како надворешен соработник за ПР стратегија во разни сектори.

Каролина, пак, иако е професор по македонски јазик, работи како директор за продажба, инвестиции и ширење бизнис во фирма во градежна индустрија.

За неа, Бојан со гордост вели:

„Еден од ретките експерти во Македонија за сите видови на стакло - од потекло до производство“.

Но, тој ни раскажа и интересни детали за нивната љубовна приказна - од почетоците во една скопска дискотека, до денес, кога живеат во хармонија со својот 7 и пол годишен син.

Прочитајте го целото интервју:

Како и кога почна вашата љубовна приказна?

Се запознавме во Privilege, дискотека во паркот во Скопје. Не требаше да одам таа вечер таму, испадна спонтано.

Не требало ни Каролина да оди таа вечер таму, непланирано е и таа во диското.

Во еден момент таа се врти и бара уште една пијачка од келнерот.

Келнерот е зад мене... јас мислам дека мене ми наздравува и за една минута се бутам низ гужва и одам да ѝ пријдам.

Се запознаваме, пиеме пијачка... правиме муабет и на крај завршуваме со бакнеж и танц на песна од Тоше Проески, „Громови на душа“.

Со што ја освои сопругата? А што најмногу ти се допадна кај неа на прва?

Мислам дека ја освоив со искреноста. Бев искрен дека сакам да бидам со неа и дека сакам ова да трае.

Кај неа ми се допадна тоа што беше многу човечна, пристапна и едноставно имавме многу теми за разговор.

Се сеќавам дека не можевме да се разделиме од муабети и дека имавме долги, долги прошетки низ Скопје додека разговаравме за сè и сешто.

И двајцата бевме на факултети кои бараат многу читање, многу книги и често имавме и филозофски дебати со спротивни ставови.

Дали уште веднаш знаеше дека таа е вистинската или со текот на времето сфати дека сте создадени еден за друг?

Првиот ‘дејт’ ни беше на стадион. Македонија - Велс, 2:1. Таа е страстен навивач на Јувентус, но уште поважно е дека сака спорт и сака фудбал.

Потоа бевме на тост во сендвичарата кај Луна Паркот и толку ни беа парите.

Но, ниту јас се чувствував без врска, нити таа чекаше од мене јас сè да плаќам.

Бевме едноставни, млади луѓе на кои не им беше важно што имаат, туку дека едноставно се имаат еден со друг.

И кога тоа чувство го носиш во себе за другиот, знаеш дека си припаѓате еден на друг.

Продолжува на следната страница...