Миријам од Мексико живее во Македонија: „Во Маврово првпат видов снег, многу луѓе знаат шпански поради теленовелите“

Живееш во Скопје, но си посетила ли други места? Кое ти остави најголем впечаток? Има ли место што не ти се допадна?

Ги имам посетено само Маврово, Пониква, Велес, Битола, Св. Никола, Галичник и Охрид.

Омилено ми е Маврово бидејќи таму првпат видов снег.

Има снег во Мексико, но само на планините и на северниот дел од земјата, но во мојот роден град, никогаш не врнело снег.

Исто така, ми се допаѓа Охридското Езеро.

Мислам дека секое место има своја убавина.

Дали со сопругот планирате да останете во Македонија или размислувате и за Мексико?

Мислам дека ќе останеме овде. во Македонија.

Овде се роди син ни и ни се допаѓа животот.

Мексико е убава земја, но е поголема и животот е покомплициран.

Но, којзнае, можеби еден ден ќе се преселиме некаде.

Го учиш ли македонскиот? На кој јазик зборува вашиот син? На кој јазик комуницирате дома?

Немам многу време да го учам јазикот, но мислам дека го разбирам, но срам ми е да зборувам.

Многу зборови се слични на шпанскиот, па пробувам да разберам од контекст.

Сега со син ми ги учиме двата јазика – тој добро разбира и зборува шпански и македонски, а има само две години.

Со сопругот зборуваме на англиски, некогаш македонски, но полесно ни е на англиски.

Има ли многу разлики во воспитување на децата овде и во Мексико?

Мислам дека зависи од семејството, но главно воспитувањето е многу слично.

Го учиме син ни на дисциплина, манири, да покажува почит, да биде учтив…

Кој ти беше најголемиот културен шок во Македонија? Има ли нешто на коешто не можеш да се адаптираш?

Најтешко ми беше периодот кога дојдов во Македонија и го немав социјалниот живот како дома, односно моите најблиски пријатели.

Но, почна да се подобрува кога се вработив и почнав да сретнувам ново луѓе.

Сега имам мои пријатели, а одлична е и латинската заедница бидејќи се дружиме еднаш месечно и зборуваме шпански и, секако, се разбираме бидејќи се соочуваме со слични ситуации.

На почетокот јазикот ми беше малку комплициран, но сега кога зборувам и разбирам повеќе, се чувствувам поудобно.

©CRNOBELO.com Забрането преземање и копирање. Крадењето на авторски текстови е казниво со закон.

Софија Спирова | Црнобело