Ваце Бонга за латино забавите кај нас: „Среќен сум кога некој дошол само да види, а си оди испотен од играње и насмеан“

Дали сакаат младите латино журки, се забавуваат ли, дали танцуваат (или повеќе стојат)?

Апсолутно да! Младите се најентузијастични и многу ме радува тоа што ги има во се поголем број.

Не е вистина дека само стојат - тие сакаат да се движат, да се опуштат, да ги пуштат емоциите.

Латино забавата е таква што не ти дозволува да стоиш во место, те тера да играш, да го следиш ритамот.

Најчесто настапувам со комерцијална латино музика, но понекогаш кога сум во комбинација со латино танцов клуб како КаДенс или Сонриса, имаме и краток курс за салса/бачата на почетокот, за да ги ослободиме.

На која возраст се обично оние што доаѓаат на забавите?

Има од секоја возраст.

Најчести се студенти и средношколци, но скоро секогаш има и повозрасни кои се љубители на латино или кои, едноставно, сакаат да се опуштат во добра атмосфера со млади луѓе.

Која им е омилена латино песна што ти ја бараат?

Не можам да одвојам една, но може да се каже дека едни од најбараните песни се Vivir Mi Vida, Taki Taki, Gasolina, Te Bote...

Како изгледа една твоја забава?

Енергична и пријатна! Почнуваме со неколку „живели“и со опуштен латино микс додека да се загрееме, а потоа влегуваме во друга димензија каде што мора да има динамика, брзина, контакт со публиката и на крај може да се додаде и некој македонски хит за пееме сите заедно.

Понекогаш има и промоција на коктели, а пред шанкот за коктели скоро секогаш има голема гужва, но на младите им се допаѓа и пена-парти кај што може да се каже дека не се знае „кој пие, а кој плаќа“.

Кога ќе видам како некој што е дојден „само за да види“ завршува испотен и насмеан, тоа е мојот најголем успех.

©CRNOBELO.com Забрането преземање и копирање. Крадењето на авторски текстови е казниво со закон.

А. Ј. | Црнобело