Катерина Шехтанска за стилот и убавината: „Не одам никаде без патики, со балет и фастинг лесно го намалив вишокот килограми“

Нега и убавина на лицето

Дневна рутина за лице немам, го мијам и ставам крем обавезно затоа што имам сува и деликатна кожа која е тешка за одржување, и затоа посебно не се оптоварувам, затоа што на сè реагирам.

Промена кај мене е тоа што почнав да користам и серуми кои се внимателно одбрани, затоа што сум алергична на сè.

Третмани порано правев поретко, да не кажам ич, а кај Маги одев на освежување и масажа ако загусти само. Сега веќе, откако наполнив 45 години, морам да внимавам повеќе.

Почнав соработка со салон за убавина на моја пријателка, доктор Мерал Неби, па сега ме „тинтраат“ повеќе.

Маски користам кога ќе отидам на третман, ќе ми се израдува тогаш кожата, а дома си правам пилинг со талог од кафе и кокос.

Начин на исхрана

Искрено, не внимавам на храна, јадам сè и сешто.

Имав период кога качив многу килограми и тоа беше единствениот период кога повнимавав и тоа со фастинг и повторно враќање на балетот, што ме врати во форма за кратко време.

Имам среќа што брзо симнувам килограми, ама и брзо качувам.

Од никаква храна не се лишувам, јадам сè, а најмногу месо и благо, и тоа во големи количини, за жал.

Омиленото јадење што јас знам да го подготвам одлично е паста на 1001 начин.

Рутина за вежбање

Се вратив повторно на мојата прва љубов, балетот, но сега повторно правам пауза, а не знам зошто.

Ама најлошото од сè е што вежбам, па престанувам, и покрај природниот стрес од секојдневниот живот што ми го сервира, му правам на организмот и дополнителен стрес со вежбање па пауза, па повторно... и така.

Среќа, цел живот вежбам, од дете и мускулот памти (така викаат). Ама до кога, времето ќе покаже.

Нешто што сакам и секоја година кажувам дека ќе го направам е план за планинарење, а никако да го реализирам.

Инаку сум сигурна дека ќе ме смени скроз, како физички, така и психички.

©CRNOBELO.com Забрането преземање и копирање. Крадењето на авторски текстови е казниво со закон.

А. Ј. | Црнобело