Бранкица живее со мултипла склероза: „Преку ноќ престанав да гледам со левото око, не се откажувам иако е тешко“

Детали

вторник, 02 декември 2025

„Болеста е многу непредвидлива и за неа се вели дека кога ќе почнеш да се опушташ, таа секогаш те потсетува дека е тука. Има денови кога едноставно не бидува, но мораш, нема откажување, си ја подместувам круната и врвам низ денот. Јас со мојата болест станав и мајка по вторпат на една прекрасна девојка“ - вели Бранкица од Пробиштип за CRNOBELO.com.

Браници Миновска (37) од Пробиштип веќе 11 години живее со мултипла склероза, која ѝ била дијагностицирана на нејзини 26 години. 

Неодамна таа започна инспиративен подвиг, со кој ја покажа хуманоста на дело и покрај дијагнозата. 

Бранкица секој месец прави роденденска торта за деца од семејства од ранливи категории кои не можат да си дозволат нешто повеќе, а токму тоа е нејзиниот издувен вентил и она што ја одржува. 

Бранкица од Пробиштип прави торти за деца кои не можат да си дозволат: „На едно од нив никогаш не му славеле роденден“

Нејзина најголема поддршка се сопругот и двете деца, а вели дека не се предава и не се откажува и покрај тоа што животот не секогаш е лесен. 

За CRNOBELO.com Бранкица накратко опишува како се живее со оваа дијагноза... 

Кога ја доби дијагнозата?

Дијагнозата ми се откри на 26 мај 2014 година, тогаш имав 26 години.

Како реагираше кога ти соопштија докторите, како се носеше тогаш со тоа, а како денес?

Кога дознав, тоа беше шок кој никогаш не се заборава секако.

Не знаев како баш мене ми се случува сето тоа. Сè уште го паметам докторот од магнетната кога ме повика и ми кажа дека имам ретка болест. За жал тоа беше најлошиот ден.

Како дојдовте до дијагнозата, какви симптоми имаше?

Случајно преку ноќ престанав да гледам со левото око.

Пред тоа немав буквално ништо, освен настинки од кои многу често страдав, па се тешев на слабиот имунитет дека се должат.

Како ја прифатија веста најблиските, знаеја ли и децата?

Многу тешко, посебно татко ми многу тешко го прифати тоа, а мојот син беше многу мал за да разбере што ми се случува.

Се третира ли некако оваа болест? Внимаваш ли на нешто откако ја доби дијагнозата?

Секако, има интеферонски терапии кои се многу тешки и некогаш многу болни.

Какви симптоми имаш сега и како се справуваш со нив? Има ли некој познат тек на болеста или е непредвидливо тоа?

Болеста е многу непредвидлива и за неа се вели дека кога ќе почнеш да се опушташ, таа секогаш те потсетува дека е тука.

Продолжува на следната страница...