Слаткар објави нов албум: „Сања не ми пишува текстови, со Калиопи ни оди многу лесно - тоа е некоја магија што не се опишува“

Детали

среда, 03 декември 2025

„На Моша мислам дека му е омилен дуетот со Калиопи, ама па му се свиѓа и ‘Еминем’ и ‘Госпоѓа Сара’. Не може ни он да се реши“ - вели за CRNOBELO.com Слаткар, кој денес (03.12) издаде нов албум, наречен „Одлични (5)“.

За 2025-та може да се каже дека е година на Марко Маринковиќ Слаткар, барем на музички план.

Во мај издаде EP со 7 песни, потоа одржа голем концерт во Скопје заедно со Тони Зен во полната арена „Борис Трајковски“, а денес (03.12) го промовира своето второ ЕР (еден вид на мини албум) со 5 нови песни.

Албумот наречен „Одлични (5)“ потсетува на училишна оценка, па во тој стил е и каверот за песните што ги направи - седнат на школска клупа, пред табла, со дневник пред себе.

Дури и една песна е со наслов „Класниот“.

Освен песните, како и пред некој месец, Слаткар промовира спот за секоја од нив.

И овој пат има неколку соработки - со Калиопи, Пајак и Obie Triece.

За новото музичко чедо, Слаткар раскажа во разговорот за CRNOBELO.com:

„Снимив пет песни, па тоа е као мал албум. Се вика ‘Одлични 5’, сите пет песни се одлични, имаат оценка.

Не можам да одвојам омилена реално, сите ми се фавори. Ама публиката кога ќе ги чуе сигурно ќе си избере.

На Моша мислам дека му е омилен дуетот со Калиопи, ама па му се свиѓа и ‘Еминем’ и ‘Госпоѓа Сара’. Не може ни он да се реши“.

Слаткар сам си ги пишува текстовите на песните, но и неговата сопруга Сања е одличен текстописец, па го прашавме дали сепак му помогнала малку околу новиот материјал.

„Не, она е толку окупирана со својата работа, што стварно нема време. Ама знаеш како? Некогаш се седаме по дома, обично тогаш ги мислам стварите, не ги пишувам, туку ги мислам во глава.

И знам некад да ѝ кажам: ‘Еј, дај ми рима за зима’ и ќе го направи тоа. Сакам да кажам, ќе ми најде нешто. Увек е добра ‘да фрли’ некаков дел што можеби недостасува, ама тоа е збор-два.

Не дека она седнала да напише текст. Тоа го правеше порано, ама сега многу малце пишува“ - вели Слаткар.

За сите пет песни тој сними и спотови и тоа во неколку дена.

„Да, решив дека ќе извадам во исто време и албумот и спотовите. Ми остана во глава она што ти го кажав и минатиот пат - дека се понашам ко Битлси кои направиле албум за две недели.

Тогаш направив албум за еден месец. Сега пак го склопував албумот технички во многу мал период, пак во месец дена, а креативно го размислував малце подолго“ - ни откри тој.

По неколкуте концерти што ги направи периодов, а кој имаше и публика што растеше со неговите песни, но и млади кои сега почнале да го слушаат, го прашавме и „колку време ќе му треба пред да организира нов концерт и да го претстави во живо новиот материјал.

„Луѓето што пред 15 години мислеа дека сме само некаква појава, дека се за**аваме и имаме среќа, сега сфаќаат дека имаме сериозна порака, дека правиме сериозни текстови, дека стварно сме новите Миладиновци, новиот Кочо Рацин.

Мојата појава има смисла, има зошто јас го правам ова - не го правам ни да бидам славен, ни да бидам главен, ни за пари го правам.

Воглавно верувам дека мојата порака стига секаде кај што не стигнала. И поради тоа веројатно има наплив на нови луѓе што ме слушаат, на нов бран. Па здравје, следен концерт ќе има за многу скоро“ - ни кажа.

Продолжува на следната страница...