Ирена Карамачоска: „Добив дијагноза рак на 34 години - ќерка ми имаше 6 месеци, а утеха ми беше што ќе се лекувам во Берлин“

Што значи да се прима хемотерапија? Имаше ли негативни ефекти, како се справи со истите?

Има различни лекови за хемотерапија. Од некои се јавуваат сериозни несакани ефекти, додека од други речиси и нема, а исто така, не секој организам ги поднесува исто.

Од првите 12 хемотерапии, освен опаѓање на косата, невропатија и вештачка менопауза, немав многу други изразени физички несакани ефекти.

Но, од последните 4 хемотерапии добив посттрауматско стресно нарушување, бидејќи ги доживеав многу тешко, со силно гадење и повраќање.

Три дена не јадев ништо додека чекав да помине дејството на лековите, бидејќи дури и од помислата на храна имав гадење.

А што значи да се прима имунотерапија? Имаше ли негативни ефекти, како се справи со истите?

Имунотерапијата не делува исто како хемотерапијата и несаканите ефекти се различни.

Гадење и повраќање скоро и да нема, но докторите ме предупредија дека постои можност да се добијат поретки, но посериозни автоимуни реакции, кога имунолошкиот систем ги напаѓа сопствените органи.

За среќа, досега кај мене не се манифестираше ништо од ова. Се надевам така ќе биде и со наредните 8 терапии.

Зошто медицинските лица од онкологија се луѓе со срце планина?

Тие луѓе секојдневно го гледаат стравот и очајот во очите на секој човек што дошол таму да се лекува. Самото тоа што се посветиле на оваа професија зборува доволно.

Да работиш со луѓе во нивните најранливи моменти, да носиш лоши вести, а притоа да останеш смирен, да дадеш надеж и чувство на сигурност, за тоа треба големо срце.

Имаше ли зрачење? Како помина со зрачењето? Тежок ли е овој дел од лекувањето?

Имав 16 зрачења, секој ден по 5 минути. Радиотерапијата изгледа како правење снимка со компјутерска томографија, не е тешко и не остава веднаш несакани ефекти.

Подоцна може да се појави умор и црвенило на кожата, кај мене беа присутни и двете.

Како помина операцијата?

За среќа, операцијата помина лесно и не можев да бидам позадоволна од исходот.

Бидејќи, како што спомнав, до моментот на операцијата туморот веќе не се забележуваше на мамографијата, ми беше направена само лумпектомија.

Тоа е зафат каде што се отстранува само туморот и мал дел од околното ткиво, со цел да се зачува колку што е можно повеќе од градата. Во мојот случај немаше тумор, но заради понатамошни испитувања отстранија мал дел од ткивото и неколку лимфни жлезди преку мал засек под пазувата.

Што ти падна најтешко во текот на целиот процес?

Најтешко ми беше тоа што не можев целосно да ѝ се посветам на ќерка ми, бидејќи третманите беа многу исцрпувачки.

Но, како што полека се закрепнувам, сè повеќе имаме заеднички активности.

Сметаш ли дека болеста те направи посилна?

Не сум сигурна дали ме направи посилна, но дефинитивно ме направи поемотивна.

Сега работите ги доживувам поинаку и повеќе сочувствувам со сите кои се соочуваат со нешто слично, бидејќи можам да ги разберам низ што поминуваат.

По сè што се случи во моето семејство, сфатив дека најважно е јас и луѓето кои ги сакам да сме добро.

Што промени во начинот на живот?

Моето секојдневие не се промени многу, само почнав повеќе да го ценам животот и малите работи.

Се трудам да јадам поздраво и секоја прилика кога сум слободна ја користам да зготвам нешто убаво и здраво за моето семејство.

Си ги зачував и старите навики, пијам кафе секое утро, а слатките задоволства ги чувам за посебни пригоди.

Верувам дека тоа што не направив радикални промени, туку најдов некаков баланс меѓу животот пред и по дијагнозата, ми помогна најмногу да го зачувам моето ментално здравје.

Порака до сите што во моментот минуваат низ истото…

Никој не треба да ги поминува овие тешки моменти сам и во изолација.

Побарајте помош и разговор со некој секогаш кога имате потреба.

За жал, оваа болест денес е многу распространета, и каде и да се свртите, секогаш има некој кој поминал низ истото и може да сподели искуство, совет или само да ве ислуша. Не се срамете да прашувате.

©CRNOBELO.com Забрането преземање и копирање. Крадењето на авторски текстови е казниво со закон.

Симона Симионова | Црнобело