Гоце Чочков, јога инструктор: „Јогата не е религија ниту секта, не мора да сте еластични за да почнете да вежбате“

Јогата е религија (или секта) – Јогата е филозофија и практичен систем за здравје. Таа не бара да припаѓате на одредена религија или да менувате нешто во своите верувања. Таа е алатка која ни помага да се поврземе со себеси на многу подлабоко ниво.

Или пак мора да бидеш веган, слаб или хипстер за да практикуваш – Јогата е за реални луѓе со реален живот. Не мора да имате одредена тежина, да се облекувате на специфичен начин или да имате посебна исхрана за да бидете дел од часот. Единствениот вистински услов е желбата да направите нешто добро за вашето ментално и физичко здравје.

Јогата не нè става во калап, напротив – таа ни помага да ги скршиме калапите што самите сме си ги наметнале.

Кажете ми нешто повеќе за вашите retreats со едрилици. Што е вклучено во нив и како изгледа еден просечен retreat?

Ретритот на едрилица е мојата најголема страст, бидејќи тие нудат совршен спој на авантура, мир и длабока поврзаност со природата. Идејата е да се излезе од секојдневната рутина и целосно да се препуштиме на елементите – морето, ветерот и сонцето.

Мојот прв ваков ретрит го реализирав во октомври 2025 година и поминавме навистина прекрасно. Избравме една од најубавите рути во Грција, островите на Северните Споради: Скијатос, Скопелос и Алонисос. Тоа беше седумдневно патување кое ги надмина сите очекувања.

Секој ден е внимателно испланиран за да се постигне баланс помеѓу активноста и одморот:

Утринска пракса на палуба или на брег: Денот го започнуваме со јога пракса и техники за дишење (Pranayama) додека сонцето изгрева, на некоја тивка плажа.

Пловење и истражување: По појадокот, ги креваме едрата и пловиме кон скриени заливи каде што водата е кристално чиста или пак остануваме. Ова е време за пливање, меѓусебно дружење или едноставно уживање во звукот на брановите.

Вечерна релаксација: При зајдисонце, практикуваме потивка, ресторативна јога или медитација. Вечерите ги поминуваме во автентични таверни на островите или под отворено небо на едрилицата.

Овој тип на ретрити се комплетно искуство кое вклучува:

7 дена сместување на едрилица опремена со сè што е потребно за удобен престој.

Секојдневни јога часови и медитации адаптирани на условите на море.

Водена рута низ некои од најубавите острови и скриени места кои се достапни само по морски пат.

Професионален скипер кој се грижи за безбедноста на пловидбата, додека јас сум посветен на праксата и благосостојбата на групата.

Ова не е само одмор, туку трансформативно патување каде што учесниците учат како да го забават темпото, да дишат длабоко и да се вратат во рамнотежа со себеси. По успехот на минатогодишниот ретрит, со нетрпение ги подготвувам следните авантури!

Која е целта на ваквите патувања – дали духовно будење, релаксација?

Целта на овие патувања е всушност една холистичка трансформација. Тешко е да се одвои релаксацијата од духовниот аспект, бидејќи кога телото вистински ќе се релаксира, умот природно станува поотворен за подлабоки искуства на пример:

Длабоко „исклучување“ од секојдневието – кога сте на едрилица, опкружени со бескрајното синило, вие сте физички одвоени од метежот, обврските и дигиталниот свет. Тоа овозможува инстантна релаксација на нервниот систем која не може да се постигне во градска средина.

Враќање кон природата и себеси – морето има неверојатна моќ да нè приземји. Пловењето бара од нас да бидеме присутни во моментот. Тоа е она „духовно будење“ за кое зборуваме, не е нешто мистично, туку едноставно повторно наоѓање на сопствениот центар и внатрешен мир преку тишината и движењето.

Заедница и споделување – овие патувања градат прекрасни пријателства. Кога група луѓе споделуваат мал простор на едрилица, вежбаат заедно и истражуваат нови острови, се создава посебна енергија на поддршка и разбирање.

Накратко, целта е секој учесник да се врати дома не само одморен, туку со „наполнети батерии“, појасен поглед на светот и со алатки (техники на дишење и јога) кои ќе му помогнат да го задржи тој мир и во секојдневието.

Дали патувањата ги исполнуваат очекувањата на луѓето или се случува некој да има потполно различна замисла од она што го нудите?

Бидејќи овој тип на ретрит е навистина специфична и карактеристична приказна, многу поразлична од класичните јога патувања во хотел или спа-центар, мојот пристап е максимална транспарентност.

Се трудам уште пред почетокот на патувањето да им објаснам што е можно повеќе детали на учесниците. Мојата цел е тие да немаат никакви заблуди – пловењето на едрилица подразбира специфичен начин на живот, поблизок контакт со природата и функционирање во заедница на ограничен простор.

Наместо да продавам само „совршена слика“, јас им ја претставувам реалност и авантурата. Кога луѓето однапред знаат што да очекуваат, тие доаѓаат со отворен ум. Токму затоа, досегашното искуство покажува дека очекувањата не само што се исполнети, туку често се и надминати.

Она што на почетокот можеби некому му изгледало како предизвик (како спиењето на брод или менувањето на плановите според ветерот или невреме), на крајот станува најубавиот дел од патувањето – моментот кога навистина се препуштаме на животот и неговиот природен тек.

Најважно ми е на ретритот да дојдат луѓе кои се подготвени за автентично искуство. Кога очекувањата ќе се заменат со љубопитност, тогаш се случува вистинската магија.

Од каде ја добивте идејата за јога на едрилици?

Идејата за јога на едрилица се роди сосема природно, како спој на јогата како внатрешна дисциплина и морето како симбол на апсолутна слобода.

Секогаш верував дека најдлабокиот мир се наоѓа таму каде што елементите на природата се најсилни. Пловењето, исто како и јогата, бара од вас да бидете во моментот, да го следите здивот (или ветерот) и да бидете во хармонија со она што ве опкружува.

Сакав да ја извадам праксата од затворените простории и да им понудам на луѓето искуство каде што подлогата за јога е плажата, а звучната изолација е само шумот на брановите.

Овој концепт започнав да го претворам во реалност неодамна. По долги години планирање и лична пракса, мојот прв официјален ретрит од ваков тип го реализирав минатата година, во октомври 2025 година.

Тоа беше патување низ магичните острови на Грција кое ги помина сите очекувања. Иако формално како организатор на вакви специфични патувања сум на почетокот, моето искуство како јога инструктор и долгогодишната поврзаност со морето ми овозможија да создадам концепт кој е зрел, безбеден и длабоко трансформативен.

Ова е само почеток на една долга приказна која планирам да ја развивам и интернационално со уште повозбудливи рути во иднина.

©CRNOBELO.com Забрането преземање и копирање. Крадењето на авторски текстови е казниво со закон.

Софија Спирова | Црнобело