Томас Петровски (19) од Сиднеј ја посети Македонија: „Прадедо ми мигрирал во 1961-ва, имам семејство во битолско“

Колку ти делува сменета Македонија од твоето прво доаѓање до денес?

Македонија дефинитивно се промени и се разви со текот на годините.

Инфраструктурата се подобри, има повеќе модерни бизниси, а помладата генерација се поврзува сè повеќе со светот.

Во исто време, земјата успеа да ги зачува своите традиции и идентитет, што е нешто на што навистина се восхитувам.

Која е твојата омилена традиционална храна, кои места сакаш да ги посетуваш, каква музика сакаш да слушаш?

Мојата омилена традиционална храна е тавче гравче, а веднаш по неа следуваат ќебапи и шопска салата.

Моите омилени места за посета се Битола, Охрид и Националниот парк Пелистер.

Исто така, уживам во посетата на селата од каде што потекнува моето семејство бидејќи тие имаат посебно значење за мене.

Многу уживам во македонската музика. Некои од уметниците што ги слушам се Орце Стевковски, Влатко Миладиновски и Некст Тајм.

Песни како „Ако некој праша од каде си“, „Велат не нема“ и „Слушам кај шумат шумите“ се меѓу моите омилени.

Што има Македонија што Австралија го нема, а што навистина ти се допаѓа?

Најсилното нешто што го има Македонија е чувството за идентитет и поврзаноста со историјата.

Во Македонија, семејството, културата и традицијата се дел од секојдневниот живот.

Австралија е фантастична земја, но има нешто многу посебно во тоа да бидеш опкружен со сопственото наследство и да гледаш векови историја околу себе.

Дали сè уште имаш семејство тука? Дали си близок со нив?

Да, сè уште имам семејство во Македонија, но не многу. Тие се околу битолскиот и скопскиот регион.

Редовно сме во контакт. Секогаш кога ќе дојдам во посета, тие ме тераат да се чувствувам како дома и ја зајакнуваат мојата врска со земјата.

Ти си професионален фудбалер. Кажи ми за твојата кариера, но и твојата поврзаност со репрезентацијата на Македонија...

Почнав да играм фудбал кога имав четири години во Рокдејл Илинден во Сиднеј.

Подоцна се преселив во Англија за да ја посетувам фудбалската академија Брук Хаус, а поминав време играјќи и во Италија.

Фудбалот ми даде можности да патувам, да запознавам различни луѓе и да растам и како играч и како личност.

Едно од моите достигнувања на кои најмногу се гордеам беше учеството во младинската репрезентација на Македонија.

Претставувањето на земјата од моето потекло беше посебно искуство и нешто на кое секогаш ќе бидам горд.

Мојата цел е да продолжам да ја развивам мојата кариера и да играм на највисоко можно ниво.

Дали можеш да се замислиш себеси како живееш тука еден ден?

Македонија секогаш ќе биде втор дом за мене и дефинитивно можам да се замислам себеси како поминувам повеќе време тука во иднина.

Без разлика дали преку фудбал, бизнис или проекти во заедницата, сакам да останам поврзан со Македонија и да придонесам за нејзината иднина на кој било начин што можам.

©CRNOBELO.com Забрането преземање и копирање. Крадењето на авторски текстови е казниво со закон.

А. Ј. | Црнобело