Љубовната приказна на Фросина од Скопје и Цезар од Курдистан: „Живееме заедно од првата недела, на свадба имавме буткање врата“

Раскажи ни накратко впечатоци од свадбата тука, која воедно стана вирална заради кул видеото на кое трчате за да се фотографирате со гостите по маси? 

Нашата свадба беше делумно традиционална, а делумно модерна. Имавме земање на невеста, буткање на врата, вртење погача, ставање пари во чевли, па дури и качување на тапан.

Сите тие традиции се многу слични со традициите во Курдистан и им беа омилени на гостите кои не се од Македонија. Странците играа оро, тропаа на дајре и им ставаа пари на музичарите.

Исто така имаше дел со салса изведба координирана од Вајб Салса и огромна модерна журка во вториот дел од свадбата.

Идејата за виралното видео каде што трчаме од маса до маса за време на вечерата ми ја даде моја пријателка, Милена, неколку недели пред свадба.

Јас им ја испратив на фотографот Виктор и DJ Фичо ноќта пред свадбата. Супер реакција добив од двајцата и спонтано ја спроведеме за време на вечерата.

Наредниот ден јас и Цезар имавме по 150 нови следбеници на Инстаграм и милион прегледи на видеото. Дефинитивно не очекувавме толкава реакција. Ние едноставно сакавме да имаме време за вечерата.

Какви се мажите од Ирак? Каков е Цезар?

Мажите во Ирак се многу слични на балканските мажи – обожаваат да седат во чајхана (нивната кафеана), дискутираат политика и секојдневни проблеми, живеат во семејни заедници и финансиски помагаат на целото семејство.

Во овој поглед, Цезар не е типичен Ирачанец. Она што тој го дели со повеќето мажи од Блискиот исток е беспрекорната црна брада, огромната почит кон жената и семејството и краткиот фитиљ.

Во речиси сè останато е „канадизиран“, или како што тој би сакал да каже, „жител на светот“.

Што ти се допадна најмногу кај него? Со што те освои, а што е тоа што ден-денес најмногу го сакате еден кај друг?

На прв поглед најмногу ми се допадна тоа што Цезар е забавен, има неисцрпна енергија, како и неисцрпна доза на адреналин.

Имаме исти интереси – играме кубанска салса, планинариме, кампуваме, нуркаме, гледаме Формула 1, возиме мотор (Цезар вози, а јас уживам), го шетаме светот и обожаваме нови искуства.

Ретко кој може да „се носи“ со нашиот динамичен стил на живот, па секојдневно сме благодарни што се имаме еден со друг.

Денес најмногу го ценам тоа што за Цезар, јас сум секогаш на прво место – пред работата, семејството, или пријателите.

Нашата секојдневна мисија е да го направиме партнерот среќен.

Што е најромантичното или најлудото нешто што сте го направиле еден за друг?

Цезар е прекрасен партнер и сопруг. На почетокот на врската јас често патував за Америка во посета на клиенти.

На секое враќање дома ме чекаше различно изненадување. И ден денес, Цезар често се враќа од работа со свеж букет цвеќе.

Што се однесува до лудост – најлудо нешто што Цезар го направил е да се ожени со мене! Добива дневна балканска доза на стрес и адреналин.

Од моја страна, јас лани го изненадив со неговиот мотоцикл од соништата – Дукати Диавел.

Не знам дали е тоа романтично или лудо, но неговото возење дефинитивно спаѓа во категорија „лудост“.

Има ли некакви разлики помеѓу вас со оглед на тоа што доаѓате од различни места и култури? 

Цезар е курд од северен Ирак. Културата и навиките на курдите се многу послични до македонските отколку до арапските.

Имаме многу слична храна, традиции, па дури и огромен број на исти зборови! Секако дека понекогаш наидуваме на недоразбирања, но помага тоа што и двајцата имаме израснато надвор од нашите земји на потекло, па имаме многу разбирање за различни култури.

Цезар е дефинитивно многу „посличен“ до моите размислувања и начин на живот од кој било Канаѓанец роден во Канада.

И двајцата имаме многу активен животен стил и го ставаме здравјето на прво место. И двајцата живееме далеку од семејството и роднините и имаме пријатели низ сите континенти.

Продолжува на следната страница...