Вероника, Русинка мажена во Скопје: „Љубовта ме донесе тука пред 14 години – обожавам ајвар и греана ракија“

Што те нервира најмногу тука?

Најмногу ме нервира дека има премногу бездомни кучиња, и опасно е заради тоа да ги пуштиш децата да отидат до продавница, но многу се надевам дека тој проблем ќе се среди.

И многу ме нервира кога е многу топло надвор, односно кога е над 35 степени во лето, е ужас за мене и во тие моменти ми недостасува мојата Русија.

Го научи ли брзо јазикот? Тешко ли беше средувањето на документи?

Македонскиот јазик го научив речиси брзо, кога живеев во Москва идев на курс 2 месеци, а потоа кога доаѓав овде внимателно ги слушав другарите и родителите на мојот сопруг што зборуваат и цело време пробував да сфатам за што прават муабет, и за околу 1 година веќе зборував и разбирав.

За средување на документи, искрено, многу се мачев додека ги собирав сите, и додека чекав. Помина доста време и изгубив многу нерви.

Колку често ја посетуваш Русија?

Русија ја посетувам задолжително еднаш годишно, инаку ме фаќа страшна носталгија. Кога идам во Москва пресреќна сум, а кога ќе помине некое време таму, ме фаќа носталгија за Македонија, чудна работа.

Готвиш ли македонски јадења? Кое ти е омилено? Пиеш ли ракија?

Оооо да, јас обожавам да готвам, имам Инстаграм профил каде што постојано објавувам различни рецепти и слики од моето готвење и од самиот процес, тоа е нешто што никогаш не ме мрзи, јас можам да готвам буквално цел ден.

Од македонските јадења најомилено ми е ајвар и вртена пита со месо, им се восхитувам на Македонките кои знаат да месат, тоа е едно нешто кое многу сакам да го научам.

Ракија не пијам, ама греана блага ракија ми се допаѓа, има интересен вкус.

Кои ти се омилени места од Македонија?

Во Македонија сум била скоро секаде, ама најголем впечаток ми оставија Вевчани и Кратово. Преубави места, во кои сакаш да се вратиш.

Како те прифатија роднините/пријателите на саканиот? Како се разбиравте кога не го знаеше јазикот?

Фала Богу, сите добро ме прифатија, на почеток знам сум им била многу интересна, ме распрашуваа за се и цело време ме прашуваа: „Сè е добро? Ти се допаѓа сè?“. Сега веќе не ме прашуваат толку.

Продолжува на следната страна...