Инспиративен лик: Филип Иванов – пастор во Велес, голем хуманитарец и вљубеник во природа, кој оди на служба и во Африка

Постојано сте активни за да им помогнете на луѓето... Какви хуманитарни акции правите?

Милосрдната дејност на Евангелска Црква тука во Велес веројатно е првата асоцијација за мене. Откако јас го презедов водството на црквата, ние започнавме со активно и редовно служење и помагање на нашите социјално загрозени сограѓани.

Моментално помагаме на стотици деца и луѓе со пакети храна, топли оброци, облека, помош во лекови и медицински третмани итн. Досега имаме направено и опремено две сензорни соби за деца со аутизам во две основни училишта тука, реновиравме куќи на поединци и семејства, дониравме за Детското Одделение и Неонатологија при Општа Болница – Велес, го помагаме Развојното Советувалиште при Здравствен Дом – Велес, имаме соработка и донации кон Здружението на лица со церебрална парализа и други вакви и слични дела на милосрдие.

Имаме и проект за стипендирање на средношколци и студенти, вкупно тринаесет деца во чија иднина вложуваме.

Кога зборуваме за милосрдие, нешто специфично е мојата служба во Африка, каде што во последниве десет години одам да служам и од Македонија помагаме сиропиталиште со стотина дечиња, а исто така помагаме во изградбата и одржувањето на училиште со три стотини дечиња во „џунглата“ во Уганда.

Учествуваат ли Македонците во хуманитарите акции?

Сè што ние сме направиле досега и сè што правиме на редовна основа е 100% со средства од Македонци, во најголем дел поединци, ретко кога фирми или компании тука од Македонија.

Луѓето навистина се дарежливи и штедри, посебно кога ќе знаат и ќе видат дека храната, облеката или средствата завршиле на вистинското место.

Во колкава мера се почитуваат верските празници кај нас?

Кај нас, за жал, настаните околу верските празници неретко се сведуваат на исполнување на вакви или онакви народни обичаи, додека се занемарува суштината на истите – соединувањето со Христа Спасителот.

Секој празник е всушност потсетување и учество во настаните од нашата спасителна историја, како раѓањето на Спасителот – Божиќ, Неговите смрт и воскресение – Велигден...

Советот кој им го давате на сите верници е...

Мојот совет до сите верници е тие да негуваат жив, постојан личносен однос со Господ Исус Христос, верата, молитвата и читањето на Светото Писмо да им се секојдневие, а во сите нешта да ја одржуваат благодарноста кон Бог во срцата, та само така ќе можат да ги вкусат плодовите на побожноста (љубов, радост, мир...) уште сега и тука.

Повеќе фотографии од пасторот Филип Иванов на следната страна...