Враќањето на Сашко Коцев и Врчак пречекано со овации - Како си поминавме на Златна Бубамара '24?

Ја спомна и Марјана Станојковска која со своите долги нозе му го одвлекувала фокусот, па побара организаторите в година да ставаат помалку атрактивни гости во првиот ред.

Сашко му додели награда на доктор Миодраг Врчаковски за Трајни вредности, а таткото на Врчак и познат текстописец се пошегува: „Како да те слушнав дека ми даваш награда за крајни вредности“.

Тој се сети на својата долгогодишна соработка и пријателство со композиторот Кире Костов кој почина во 2023, а кој напиша некои од најголемите музички хитови кај нас.

Во негова чест Тамара Тодевска ја испеа „Кога те нема (наоколу те барам)“ од Хелена Благне, а Андријана Јаневска ја пееше „Тајно моја“ од Тоше Проески.

„Златна Бубамара“ не може да помине без Игор Џамбазов.

Познатиот шоумен знае како да ја плени публиката, па со насмевка и во негов манир се пожали дека „откако многу се здебелил, го исфрлиле од алпинистичко друштво“.

Потоа со песна го најави Драган Мијалковски, а на доајенот на македонската музика му ја додели наградата за Животно дело.

„60 години е на музичката сцена, слави јубилеј, а наскоро ќе му правиме и концерт“, рече Игор.

Публиката го поздрави Мијалковски со стоечки овации, а тој за да ѝ се заблагодари за љубовта што му ја дава сите овие децении, ги испеа своите најголеми хитови „Кажи ми“, „223305“, „Кажи нешто драга“.

Прочитајте и: 10 eмотивни моменти од Златна Бубамара: Игор Џамбазов ја рецитираше „Т’га за југ“ за сите отселени (фото)

Кулминација на вечерта беше кога на сцената со него излезе хармоникашот Горан Алачки, па за мерак на публиката ја изведоа „Дојди Лено на перниче бело“. Во салата се играше, пееше, се креваа раце, додека на сцената Мијалковски клекна да му се поклони на Алачки за песната што му ја напиша пред многу години.

Убавата забава продолжи и со следниот гостин, Жељко Самарџиќ, кој доби награда за трајни музички вредности.

Додека тој излегуваше на сцената, публиката во еден глас почна да го пее неговиот хит „Грлица“. Од илјадници грла одеднаш почна да ечи „Шта си то у мени нашла, моја тужна грлице“, а Жељко, кој сигурно не очекуваше ваков пречек, со рацете го покри лицето и не ги криеше емоциите кои го облеаја.

„Не знам како ќе пеам после Драган Мијалковски. Мора да ви кажам дека тој беше омилен пејач на моето семејство кога беше на врвот на популарноста. На сите фестивали навивав за него. За мене, Драган е најдобриот пејач на сите времиња во Македонија“, рече Жељко.

Па, кога ја запеа „Безобразно зелене“, ја вжешти атмосферата во салата, а публиката скокна на нозе и почна да игра.

Продолжува на следната страница...