Кирил Ангелов, жртва на педофил од Велес: „Сѐ уште ги мирисам лигите на Сеништето по мојот врат додека ме злоставуваше“

Детали

петок, 07 февруари 2025

„Добар ден, имате ли парфем кој мириса на Црква? На темјан? Се чудат... Како да им објаснам дека сѐ уште ги мирисам лигите на Сеништето по мојот врат додека ме злоставуваше, нечистотијата во мојата душа...“, вели Кирил Ангелов, жртва на сексуално злоставување, кој не само што собра храброст да зборува јавно за тоа, туку и напиша книга.

Се сеќавам кога во мај 2022 година правевме интервју со Кирил Ангелов од Велес, жртва на педофилија, но и маж кој животот не го галел, па се соочил и со рак и со инфаркт, како си помислив дека ова е најтешкото интервју кое сум го направила во животот.

Но, дефинитивно и едно од најзначајните.

Зошто?

Затоа што Кирил, беше и е една од ретките жртви на педофилија во Македонија, која има храброст да зборува јавно.

И тоа да зборува од името на сите нив.

Во меѓувреме ја напиша и неговата книга „Безсловен“ каде ја споделува целата приказна и која е утеха и за другите жртви на педофилија во Македонија дека не се сами и, уште позначајно, дека имаат кому да се обратат за да си го споделат тешкото на душата.

Кирил постојано споделува колку трогателни приказни дошле до него, колку болка од нив почувствувал, но и колку утеха и охрабрување за да проговорат јавно дал.

Кирил со оваа книга стана херој од реалноста. Херој кој животот не го поштедил од трагедии, но херој кој успеал да се издигне над нив, да продолжи понатаму, а сега веќе и да помага на други кои поминале низ истото.

Во интервју за CRNOBELO.com во 2022, Кирил, за тоа како се одлучил да зборува јавно, изјави:

„Првата ‘точка на кршење’ беше во 2017 година. Тогаш имав 32 години. Што значи внатрешната борба, односно процесот на признавање дека сум жртва на сексуално злоставување траел точно 23 години.

Кога ми се случи тоа имав само 9 години, се случи трипати, во рок од три години.

Секој злоставувач (а посебно педофил) ја користи техниката „груминг.“  Тоа значи манипулативна тактика за постепено приближување на жртвата и на семејството...“

Прочитајте го интервјуто Кирил Ангелов од Велес: „На 9 години бев жртва на сексуално злоставување, зборувам јавно со надеж да помогнам на други“

Сега, тој на својот Фејсбук профил сподели дел од новата книга што ја пишува.

Кирил открива дека сака силни парфеми, по можност парфеми со мирис на Црква за да ги потисне сеќавањата од лигите на педофилот кој ги оставал на неговиот врат додека го злоставувал.

Објавата на Фејсбук на Кирил Ангелов која ќе ве наежи:

„Да мирисам на Црква:

На денов на блажената Ксенија Петроградска, ги добив резултатите дека после пет години, немам рак. „Канцер“ е премногу безболно, „рак“ повеќе боли. А болките треба болно да ги кажуваме.

Оние пет години кои ни ги даваат како стапка на преживување, оние кои никогаш не мислев дека ќе ги преживеам, оние развлечените и изгубените.

„Слава на Бога.“

Остави, остави, јас само сакам да мирисам на Црква.

„Добар ден, имате ли парфем кој мириса на Црква? На темјан?“

„Има неколку, да.“

Барам, се спровирам низ полиците, се искрадувам низ опијатите. Скапите шишиња ме заслепуваат, ме примамуваат. Барам, мирисам, парфем по парфем, сакам да ме уништи, да ме оживее, да ме понесе, однесе, одвее. Не наоѓам. А сакам.

„Зошто толку сакаш парфеми?“ ме праша со потсмев како да не може да ме разбере; а јас само сакам да бидам прегрнат за да вреснам во место кое ќе ми е сигурност.

Како да им објаснам, како да кажам? Дека сѐ уште ги мирисам лигите на Сеништето по мојот врат додека ме злоставуваше, алкохолот и цигарите во здивот на татко ми, крвта по моето лице од неговиот удар, староста на мојот дедо, нечистотијата во мојата душа, на сѐ...

Сакам да смрдам на парфем, одбивен да им бидам. Да знам и да знаат дека сум чист, но да не можат да ми се приближат. Уште чувствувам сѐ, не сакам ништо да мислам. Сакам да ме убие парфемот. Да мирисам на Црква.

Продолжува на следната страница...