Место со врвно кафе во Скопје - „Тhe Dudе" повторно меѓу 100 најдобри кафетерии во светот

Детали

четврток, 19 февруари 2026

Еден од најкул локалите во Скопје специјализирано за кафе, The Dude, втора година по ред се најде на листата со топ 100 кафетерии во светот – само три земји од Балканот се меѓу најдобрите.

На листата со топ 100 кафетерии во светот, втора година по ред се наоѓа и едно наше локално кафуле.

Станува збор за The Dude, локал специјализиран за кафе со уникатен ентериер, кој годинава е на 85-тото место на листата.

На листата со топ 100 кафулиња, само три се од Балканот, едно од Бугарија, едно од Грција, и секако The Dude од Македонија, што е одличен успех.

На својот Инстаграм профил, екипата сподели објава со повеќе фотографии од Фестивалот за кафе во Мадрид, каде упатија благодарност до сите за оваа чест.

„Почестени сме и вистински благодарни што присустувавме на Фестивалот за кафе во Мадрид, каде The Dude беше рангиран на 85-тото место на листата со Топ 100 најдобри кафетерии во светот.

Втора година по ред на глобалната Топ 100 листа – нешто што не го земаме здраво за готово.

Она што започна како мал сон во Скопје, прерасна во нешто многу поголемо за нас – заедница, место за среќавање, споделена пасија.

Тоа што гледаме дека е препознаено на глобалната сцена длабоко нè трогнува.

За нашиот неверојатен тим – вашата посветеност, талент и срце се основата за сè што правиме. Ова достигнување ви припаѓа вам.

За нашите гости, пријатели, партнери и поддржувачи – ви благодариме што ни ги доверувате вашите секојдневни ритуали, разговори и моменти. Вие сте причината заради која постои The Dude.

Горди сме и бескрајно благодарни!

Од Скопје до светот – патувањето продолжува, шолја по шолја“.

М. М. | Црнобело