Официјално изгласани нови мерки: Зголемен полициски час, забрана за гости во угостителски објекти и фитнес сали

Детали

понеделник, 05 април 2021

По шпекулациите дека наместо во 22 часот, полицискиот час ќе почнува во 20 часот, а угостителските објекти целосно се затвораат, откако во земјава ситуацијата се влоши и болничките капацитети се полнат со голема брзина, премиерот на Владата ги потврди новите рестриктивни мерки.

фото: depositphotos.com

До Владата се поднесени нови предлог мерки за заштита од корона вирусот, со оглед на тоа што ситуацијата во изминатиот период не се подобрува.

Денес, Министерот Филипче, Заменик Министерот за здравство Хасани, Премиерот Заев и д-р Караџоски одржаа прес-конференција.

Премиерот ги најави новите мерки, во продолжение дел од неговата изјава:

Почитувани граѓани, на денешната седница донесовме одлука за допонителни мерки со единствена цел – заштита на јавното здравје и на сите граѓани.

Најновите тенденции, презентирани од здравствените власти, покажуваат дека британскиот сој во земјата зема поголем замав, исто како и во другите земји. Овој вид заразува многу полесно и побрзо и најчесто резултира со тешки последици.

Од овие причини во пресрет на затоплувањето и големите празници, а согласно потребата да ги одмориме здравствените работници, донесовме нови рестриктивни мерки.

Мораме сите заедно да внесеме во справување со текот што го зазема пандемијата.

Бројот на новозаразени како последица од корона вирусот расте. Бројот на починати граѓани исто така расте. Досега здравствените работници се справуваа со сите предизвици, но сега веќе постои сериозно оптоварување.

Ова е најголемото оптоварување на здравствениот систем во државата од почетокот на пандемијата. Многу држави се соочија со оваа ситуација и порано од нас.

Од овие причини Владата донесе нови рестриктивни мерки:

Забрана и посебен режим на движење на граѓаните на територија на Р. С. Македонија од 20 часот до 5 часот наредниот ден, почнувајќи од 6 април, 2021 година до 20-ти април 2021 година.

На граѓаните кои извршиле вакцинација во центрите за вакцина, за временскиот период пред започнување на забраната и последниот режим на движење, им се дозволува враќање до живеалишта врз основа на потврда за вакцинација.

Целосна забрана за посетители/гости за сите угостителски објекти и други објекти кои во склоп на истиот даваат угостителски услуги. Може да се остварува работа со нарачки онлајн или телефонски, да се врши достава или да се подига нарачката надвор од угостителскиот објект, од 7-ми април среда до 20-ти април 2021. Исклучок од ова се угостителските објекти на аеродромите и во објектите за сместување за лица сместени во овие објекти.

Целосна забрана за посетители и гости во обложувалници, односно приемот да биде овозможен само преку шалтерска услуга, односно угостителскиот дел во казина и обложувалници да биде затворен за посетители од 7-ми април 2021 до 20-ти април 2021.

Целосна забрана за посетители во сите вежбални, фитнес центри, од 6-ти април до 20-ти април.

Се забранува организирање, одржување и присуство на секаков вид семинари, обуки, курсеви, работилници, конференции и други настани од ваков тип од 6 април 2021 до 20 април 2021.

На земјоделците им се овозможува движење врз основа на дозволите, исто како што беше овозможено на пролет.

За време на забраната и посебниот режим на движење, сите граѓани од станбени објекти кои имаат домашни миленици, може да ги изнесуваат надвор од своите домови во вечерните часови од 22 до 23 часот, најмногу до 100 метри од живеалиштето.

Останува на сила строгата забрана за групирање на повеќе од 4 граѓани и задолжително носење маска и одржување растојание.

Проследете ја прес-конференцијата: