Чичко Бурхан во чаршија вари турско кафе на песок – го служи со локумче и многу љубов (фото)
„Турското кафе во моето кафуле се мели по 200/250 грама можеби 5-6 пати на ден, сакам да е секогаш тазе, плус имаме лимонада од ружа и лимонада со нане, турски чај со домашни колачи“, раскажува чичко Бурхан за своето кафуле во Старата скопска чаршија, кое го спасило кога останал без работа поради пандемијата.
Бурхан Асан (57) е нашата инспиративна приказна на денот.
Тој кога останал без работа поради пандемијата, наместо да се затвори дома и да очајува, одлучил да си го реализира својот сон и со помош на своето семејство отворил кафуле во Старата скопска чаршија каде го служи највкусното кафе варено на песок.
За CRNOBELO.com тој ја раскажува својата приказна:
„Еве една година сум сопственик на кафулето Ottoman caffe во Старата скопска чаршија.
Рабoтeв во една приватна фирма, но заради пандемијата останав без работа, па за 3 дена се одлучив да отворам нешто ново со моето семејство, со ќерка ми и сопругата.
Мојата цел беше да го вратам турскиот обичај на пиење кафе сварено на песок во Старата турска чаршија. Кафулето го имам една година. Пред тоа овој локал бил златарски дуќан. Со малку реновирање се обидов да го направам во османлиски стил.
Во моето кафуле има само посебни вкусови: кафе на песок, уникатни лимонади како што е лимонада од ружа и лимонада со нане, турски чај со домашни колачи, десерти, салеп и оралети со посебни вкусови.
Лимонадите, десерти и колачите ги прави сопруга ми и сите се домашни. Турското кафе во моето кафуле се мели по 200/250 грама можеби 5-6 пати на ден. Секој ден се мели тазе кафе затоа што имам свој апарат за мелење кафе и сакам да е свежо.
Кога ќе кажам дека кај нас има турско кафе на песок значи кафето се вари на песок, односно самиот песок го вари кафето.
Зошто ова кафе има посебен вкус? Бидејќи не се вари брзо, туку пополека. Инаку, песокот е многу жежок и варејќи се пополека го добива тој вкус. Се сервира со локум и кисела вода.
Иако беше тешко моето кафуле да се отвори за време на периодот на пандемијата, сепак не беше толку тешко како што очекував. Ме направи многу горд што им се допадна на луѓето и што продолжува да им се допаѓа. Кој дошол еднаш, доаѓа повторно кај нас.
Реклами има секој ден од уста на уста без јас да сум свесен и тоа ме прави горд - значи дека успеав да направам нешто уникатно и за мене тоа е потпис на успехот.“
Повеќе фотографии од кафулето на чичко Бурхан:
https://www.instagram.com/p/CP0TV0rptKB/
https://www.instagram.com/p/CPgLePcJQ-J/
© CRNOBELO.com Забрането преземање и копирање. Крадењето на авторски текстови е казниво со закон.
Симона Симионова | Црнобело
Би можело да ве интересира:
Препорачуваме
Најчитани неделава
