Наша адвокатка го коментира судскиот процес на Џони Деп и Амбер Херд: „Тој не може да го добие овој случај“

Детали

среда, 01 јуни 2022

„Заробени ли сме во митот за совршена жртва па сè што отстапува од тоа сфаќање имаме проблем да го прифатиме? Или, како што рече адвокатот на Амбер Херд во завршните зборови - Колку уште треба жртвата да сними, да слика, да зборува за да ѝ се поверува само затоа што има маани?“, гласи дел од објавата на адвокатот Сузана Јошевска Анастасовска, која има 20-годишно искуство во судски предмети и процеси.

Сузана Јошевска Анастасовска, адвокат со 20 годишно искуство во судски предмети и процеси, на својот Фејсбук профил го прокоментира судскиот процес помеѓу Џони Деп и Амбер Херд, кој периодов го привлече вниманието на цел свет.

Нејзината објава:

„Циркусот наречен Depp v. Heard е правно интересен колку што е вознемирувачки.

Прашањето е: Дали ‘несовршените’ жртви на семејно насилство не се жртви? Тие кои се самите скршени и психотични од разни причини, тие кои возвраќаат и се дерат, тие со сопствени карактерни недостатоци, тие кои не се за жалење на прв поглед.

Заробени ли сме во митот за совршена жртва па сè што отстапува од тоа сфаќање имаме проблем да го прифатиме? Или, како што рече адвокатот на Амбер Херд во завршните зборови - Колку уште треба жртвата да сними, да слика, да зборува за да ѝ се поверува само затоа што има маани?

А доволно е само еднаш, само еден удар, само една епизода.

Прашањето исто така е: Дали конечно ова судење ќе ги стави на мапата на семејно насилство и мажите како жртви, особено психичко насилство со оглед на современиот развој на родовите улоги и инсистирањето на рамноправноста?

Дали Mr.Depp го скрши ледот околу сфаќањето дека и мажот треба да каже или како го смислија хаштагот #mantoo? Колку треба да се земе зборот на жената ‘здраво за готово’ доколку постои меѓусебно насилство или т.н токсична врска.

Гледано низ моите правни вијуги, Mr.Depp не може да го добие овој случај и тоа повеќе на правни основи отколку на фактички. Ама тоа не е интересно за читање.

За жал или не, САД е земја во која одлучуваат граѓани кои не се правници, а со тоа е и земја каде во исто вакво судско шоу поротата ослободи двоен убиец кога одлучуваше во случајот О.J.Simpson само затоа што ѝ се допадна магијата на одбраната.

 

За жал, ќе остане само горкиот вкус на колатералната штета на овој циркус, а тоа се сите сегашни и идни жртви на семејно насилство кои ќе го доживеат обесхрабрувачки ова јавно и скапо судење.“

С. С. | Црнобело