Изложба на ретро предмети и стари телефони на Александар Радичевски во Гостивар

Детали

недела, 21 декември 2025

Во Домот на култура АСНОМ во Гостивар вечерва (21.12) ќе биде отворена изложбата „Поглед кон минатото“ на Александар Радичевски со ретро предмети и телефони кои датираат од 1717 до 1986 година.

На оваа изложба ќе бидат прикажани 100 ретро телефони (од Првата Светска Војна па се до 1986 година) и ретро предмети кои датираат од 17ти век па се до 1986 година.

„Ова е моја прва изложба од ваков карактер, на ретро стари предмети и телефонија, воедно 3та по ред. Првата беше на тема фотографија. Втората беше на тема фотографија и рачни изработки на 3Д слики (инсталации) со природни камчиња и материјали“ - вели авторот.

Меѓу многуте предмети ќе се приложи и првиот бакалитен телефон на компанијата ЕРИКСОН од 1931 година од Шведска. Исто така на оваа изложба ќе бидат изложени и телефоните Пупин именувани по Српско-Американскиот научник и иноватор Михајло Пупин, железнички телефон ТЕСЛА, Словачка 1950, како и СИНГЕР машина за шиење од 1923 година, Обединето Кралство, Шкотска, еротски отварач од лиено железо, 1890 година, од Ирска, кантар од 17ти век, од Турција, пегла на жар 1890-1919, од Унгарија, позлатени кројачки ножици Солинген, од Германија и многу други.

„Мојата работа и посветеност на оваа изложба се фокусираат на зачувување на комуникациската историја со посебен осврт на технолошката и културолошката важност на уредите и комуникацијата во таа доба од развитокот на технологијата“.

На изложбата, рецензенти се: кустосот на Дом на Култура АСНОМ- Гостивар, Валентина Тасеска и писателот Александар Михајловиќ. 

На почетокот на 2026 година, исто така планирана е изложба и во Скопје.