Како до влезници за шоуто на Дејвид Гета во Скопје: Достапни се од петок по цена од 35 денари

Детали

среда, 13 мај 2026

„Едвај чекам“ - коментираше Дејвид Гета на објавата, а од Авалон ги објавија сите детали за влезници за најголемиот музички настан во Македонија: „⁠Сите влезници ќе чинат 35 денари, а достапни ќе бидат влезници за стоење и седење (трибина). Трибините се нумерирани и потребно е да одберете седиште при купувањето“.

По повод 35-годишнината од независноста на Македонија, вчера Бобан Милошески од „Авалон“ објави дека на 8-ми септември, ќе се случи голем музички настан.

Настаните за прослава на овој празник ќе се одржуваат од 8 август до 8 септември, а на последниот и главниот ден, на градскиот стадион во Скопје, ќе настапи светски познатиот диџеј Дејвид Гета.

Бобан најави дека шоуто од музички и продуцентски аспект е нешто досега невидено во европски рамки, но и дека за првпат стадионот ќе се наполни на сите четири трибини и на терен за музички настан.

Денес од Авалон ги објавија сите детали за тоа како може да дојдете до влезница за најголемиот настан досега:

ПОЗНАТИ СИТЕ ИНФОРМАЦИИ ОКОЛУ ВЛЕЗНИЦИТЕ ЗА DAVID GUETTA - THE MONOLITH SHOW КАКО ДЕЛ ОД ПРОСЛАВАТА ПО ПОВОД 35 ГОДИНИ НЕЗАВИСНОСТ!

Почитувани,

Согласно вчерашната најава за големиот отворен настан David Guetta - Monolith Show по повод 35 години независност, кој ќе се одржи на 8 септември во Арена „Тодор Проески“, во прилог ги споделуваме сите информации околу регистрацијата за влезници за истиот.

1.⁠ ⁠Влезниците ќе бидат достапни од ПЕТОК (15 мај) САМО на avalonbooking.mk

2.⁠ ⁠Сите влезници ќе чинат 35 денари, а достапни ќе бидат влезници за стоење и седење (трибина). Трибините се нумерирани и потребно е да одберете седиште при купувањето на влезници за една од трибините. Стоењето не е нумерирано.

3.⁠ ⁠Капацитетот на стадионот е ограничен, па наш совет е да бидете брзи во петок како би го обезбедиле своето место.

И, за крај - да, влезниците навистина чинат 35 денари и тоа е единствениот трошок за набавување влезници за David Guetta - Monolith Show на 8 септември во Арена „Тодор Проески“.

Ваша,
Avalon International Booking

M. M. | Црнобело