Градскиот парк втор викенд по ред пулсираше во ритамот на 5. Инфјужн фестивал: ПроКредит Банка со признание „Шампион на инклузија за 2025“

Детали

понеделник, 15 јуни 2026

На 13 јуни, програмата на 5. Инфјужн фестивал продолжи да ги спојува движењето, уметноста, сетилата, музиката и заедништвото со супер-уникатна програма, многу интересни активности и доделување на награди за Шампионите на инклузија за 2025 година.

Утрински ритам, „Тивки дружби“ и inFusion Базар: Градскиот парк како отворен простор за креативност во првиот дел од програмата

Летната сцена „Лепеза“ во Градски парк изминатиот викенд беше отворен простор за движење, креативност, поврзување и нови искуства. Денот започна во 10:00 часот со утринска јога, како совршен момент за раздвижување на телото, смирување на умот и позитивен почеток на фестивалскиот ден. Денот продолжи со работилницата „Тивки дружби“, интегративно искуство во кое учесниците комуницираа без зборови, се запознаа со основите на знаковниот јазик и открија поинаков начин на поврзување. Работилницата ја пренесе најважната порака, а тоа е дека комуникацијата не секогаш зависи од зборовите, туку понекогаш најсилно се случува преку поглед, движење, гест и присуство.

За време на вториот фестивалски викенд, тука беше и препознатливиот inFusion Базар, кој ги обедини креативците, уметноста, локалните иницијативи и општествената одговорност. Базарот ги обедини сите креативци, носејќи уникатни ракотворби кои ги усреќија сите присутни кои си го одбраа омиленото парче.

За крај на првиот дел од програмата, со поддршка од училиштето „Димитар Влахов“, активноста „Погледни низ моите очи“ понуди можност посетителите да го доживеат светот од поинаква перспектива. Преку симулации на различни оштетувања на видот, Брајова азбука, паметен стап, говорни програми и интерактивни вежби, публиката можеше да се запознае со секојдневни предизвици, но и со решенија, технологии и вештини што овозможуваат поголема самостојност и пристапност.

Попладневната програма продолжи со „Чувствувај во боја“, street art работилница за цртање и дизајн. Преку боја, форма и јавен простор, учесниците имаа можност креативно да ја изразат пораката на фестивалот, дека инклузијата не е само концепт, туку видлива, жива и заедничка култура.

Жирито на Инфјужн им оддаде признание на лидерите на промените - ПроКредит Банка меѓу наградените шампиони

Пред почетокот на попладневно-вечерната програма, фестивалот им оддаде признание на оние што ја движат инклузијата напред преку доделувањето на наградите „Шампиони на инклузија“. Наградите се посветени на поединци, организации, институции и компании кои со својата работа, посветеност и пример придонесуваат кон поотворено, попристапно и поправедно општество.

Во рамките на овие признанија, благодарејќи на најважните гласови на фестивалот, помеѓу наградените од страна на жирито беше и ПроКредит Банка, која беше одбрана за Шампион за инклузија како Општествено одговорна компанија за 2025 година. Со искрени обраќања, долги аплаузи и поздравни зборови беа проследени и наградите за Шампиони на инклузијата за заслуги и кон други поединци, институции и организации. 

Музичка магија под отворено небо: Инфјужн ја загреа атмосферата пред големото финале на 20 јуни

По доделувањето на наградите, вечерта продолжи со музика, одлична енергија и заеднички моменти преку богатата музичка програма на 5. Инфјужн фестивал. Настапија: Драги Иванов, Миа Перевска, Димитар Иваноски, Тина Русева и Мартина и Мето Акустик. Со овие одлични настапи, убавата енергија и насмеаните лица на сите присутни, продолжи саботната вечер која со сигурност ќе ја паметиме. Музичката програма го затвори фестивалскиот викенд, но ова не е крајот, ни преостанува финалето кое е закажано за следната сабота, на 20 јуни. 

Фестивалското патување ќе се заокружи со одлична програма, за која повеќе можете да дознаете од приказот подолу. Здружението „Икуалити“ ги поканува сите граѓани, семејства, млади, уметници, активисти, институции и компании да бидат дел од последниот ден на фестивалот и заедно да ја прославиме различноста, не како исклучок, туку како вредност што нè поврзува.

Повеќе информации за програмата се достапни на профилите и веб-страницата на фестивалот.