Претставени Кумот и Здравичарот за Бадник 2026 од здружението на граѓани „Одбор за традиционална прослава на Бадник во Скопје“

Детали

понеделник, 15 декември 2025

За традицијата која трае повеќе од три децении, денес Здружението на граѓани „Одбор за традиционална прослава на Бадник во Скопје“ ги претставија Кумот и Здравичарот за Бадник 2026 - кум е македонскиот претприемач во областа на енергетиката Зоран Кондратенко, а здравицата ќе ја каже нашиот истакнат музичар Јаков Дренковски. 

Од здружението на граѓани Одбор за традиционална прослава на Бадник во Скопје денес на прес-конференција беа претставени за јавноста Кумот и Здравичарот за Бадник 2026.

Кум Бадникар за 2026 е Зоран Кондратенко.

Зоран Кондратенко е истакнат македонски, претприемач и експерт во областа на енергетиката, по професија машински инженер, со повеќе од три децении професионално искуство во развојот на енергетската инфраструктура во Македонија и регионот. Роден е во Скопје, во старата градска населба Пaјко Маало. Во Скопје го завршува основното и средното образование, а во 1991 година дипломира на Машинскиот факултет при Универзитетот „Св. Кирил и Методиј“ на кој подоцна ги завршува и постдипломските студии.

Во 1994 година ја основа компанијата Енерго Систем, компанија која под негово раководство прераснува во важен фактор во инженерингот, консалтингот и примената на енергетски технологии. Како генерален директор и ко-сопственик, Зоран е одговорен за стратешко планирање, склучување договори, финансиски менаџмент и координација на инженерски и проектни активности. Денес Енерго Систем е вклучен во големи проекти во областа на гасоводните системи, енергетската ефикасност, обновливите извори и развојот на урбана и индустриска инфраструктура.

Здравицата за 2026 ќе ја каже Здравичарот Јаков Дренковски.

Јаков Дренковски е истакнат македонски музичар кој својата кариера ја започнал во далечната 1978 година со снимањето на неговата прва композиција „Скитник“, добро позната и ден денес. Во неговата 47 годишна музичка кариера, има одржано низа концерти како низ Македонија, така и во повеќе европски градови: Палма де Мајорка, Опатија, Ташкент, Софија, а од 1993 до 2000 година низ Франција.

Јаков Дренковски е роден Центарец во 1953 г. Има живеено во населба Пролет, па во Ново маало, а денес во Кисела Вода. Тој е семеен човек, татко на 2 ќерки и дедо на 3 внуци.

В недела (21.12.2025) напладне во месноста Краста, Одборот за прослава на Бадник во Скопје, и во живо, на своите сограѓани ќе им ги претстави Кумот и Здравичарот за Бадник 2026 соопштувајќи на тој начин дека сè е подготвено за централната прослава на 6-ти јануари на платото пред Соборниот Храм.

Месноста Краста се наоѓа на јужните падини на Водно на патот кон хидрцентралата „Козјак“. Тука скопските Бадникари ги собираат бадниковите гранчиња што на 6 Јануари со години им ги делат на скопјани, на свеченоста на платото пред Соборниот Храм Свети Климент Охридски во пресрет на Божик- најсветлиот христијански празник.