Најубавото изненадување – Џон Леџенд со широка насмевка слуша улична музичарка која пее негова песна (видео)

Детали

среда, 20 октомври 2021

Додека ја пеела „All of Me“ во шопинг центар во Бостон, уличната музичарка Рада Рао сфатила дека во публиката стои и Џон Леџенд кој со широка насмевка ја ислушал нејзината изведба до крај, а потоа ја прегрнал и ѝ дал пари.

Рада Рао е пејачка која редовно настапува на улиците во Бостон, а дел од нејзиниот репертоар е хитот на Џон Леџенд „All of Me“.

Последниве три месеци Рада секој викенд настапувала во исиот шопинг центар во Бостон, а на последниот настап имала вистинско изненадување – нејзината изведба ја слушал и Џон Леџенд.

Додека Рада ја пеела „All of Me“, околу неа имало толпа народ, кога забележала дека еден маж многу ѝ личи на Џон Леџенд.

„Здогледав маж со мантил, заштитна маска и неколку деца и си помислив ’Колку личи на Џон Леџенд‘. Не обрнав многу внимание на него, сè додека не ја извади маската и ми стана јасно дека тоа навистина е Џон Леџенд“.

Рада ја довршила песната, а Џон Леџенд ја ислушал до крај, а убавиот момент е овековечен и на видео. Пејачката самата сподели две видеа на кои се гледа како Џон со широка насмевка ја слуша неговата песна, а на крај ѝ остава пари и ја прегрнува.

„Благодарна сум што денес имав можност да пејам за неверојатниот Џон Леџенд и неговото семејство“, пишува во описот на објавата.

„Сакав да го продолжам убавиот момент. Продолжив да свирам и пеам и го дадов најдоброто од себе. Бев почестена што тој одлучи да остане, да ме ислуша и да го цени локалниот талент. Ова многу ми значи“, вели Рада.

Спирова С. | Црнобело