Комичарот Боб Сагет од хит-серијата „Full House“ почина на 65-годишна возраст - „Ги обединуваше луѓето со смеа“

Детали

понеделник, 10 јануари 2022

Боб Сагет, актерот кој се прослави со серијата „Full House“ и беше нараторот во серијата „How I Met Your Mother“ почина на 65-годишна возраст. Причината за смртта допрва треба да биде утврдена, а социјалните мрежи веќе се преплавени со објави во негова чест.

Комичарот Боб Сагет, најпознат по улогата во хит-серијата „Full House“, почина на 65-годишна возраст.

Веста ја потврди неговото семејство, со изјава за CNN:

„Со жалост потврдуваме дека нашиот сакан Боб почина денес. Тој ни беше сè и сакаме да знаете колку многу ги сакаше неговите фанови, колку сакаше да изведува во живо и да ги обединува сите луѓе со смеа.

Иако бараме приватност во овој период, ве покануваме да ни се придружите да се сетиме на љубовта и смеата што Боб му ја донесе на светот“.

Според изворите, актерот бил пронајден мртов во хотелска соба на 9 јануари, а допрва ќе се утврдува причината за неговата смрт.

Актерот се прослави со улогата во серијата „Full House“, каде што го глумеше таткото вдовец на трите мали девојчиња. Покрај него, во серијата глумеа и близначките Мери Кејт и Ешли Олсен.

Подоцна актерот беше и водител на популарното американско шоу „America’s Funniest Home Videos“.

Исто така, тој беше и нараторот во познатата серија „How I Met Your Mother“.

Низ годините, Боб Сагет се покажа и како одличен стенд-ап комичар, а често одржуваше шоуа со цел да собере пари за разни добротворни цели.

Кратко по веста за неговата смрт, колегите и фановите му додадоа почит на социјалните мрежи, нагласувајќи дека Боб бил една од најсмешните и најдобрите личности што ги познавале.

„Премногу ќе ми недостасува. Беше добар колку што беше и смешен“.

„Почивај во мир Боб. Дефинитивно еден од најдобрите и најсмешните луѓе. Многу тажно“.

„Уште сум шокиран. Зборував со него пред само неколку денови. Како и обично си кажувавме шеги. Почивај во мир пријателе“.

„Знам дека многу луѓе губат сакани секој ден. Но загубата на Боб Сагет многу погодува. Ако не го познававте, тој беше добар и вистински се грижеше за луѓето. И замина прерано“.

Потсетување на трејлерот за првата сезона од Full House:

Спирова С. | Црнобело