Бојан го доби тапанот од Ѓорѓи, кој загина во Кочани, со аманет од татко му: „Свири, за да не престанат да одекнуваат неговите звуци“

Детали

понеделник, 05 мај 2025

„Идејата на неговите прекрасни родители да ми го подарат тапанот произлезе, можеби, од тоа што пред скоро една година, за мојата полуматура, јас имав желба да тропам со неговиот тапан и Ѓорѓи тогаш од срце ми дозволи“, вели 15-годишниот Бојан, кој го доби тапанот од Ѓорѓи, кој загина во пожарот во Кочани.

Бојан Трајков (15) e ученик во прва година во гимназијата „Јане Сандански“ во Струмица.

Минатата недела овој тинејџер, го доби на подарок тапанот на починатиот музичар Ѓорѓи Горѓиев, кој загина во пожарот во дискотеката „Пулс“ во Кочани.

Бојан свири од свои 6 години, прво на тарабука, а потоа и на тапан. Тој е самоук, но вели:

„Талентот ми е дарба од Бога, но имам и голема поддршка од моите родители“.

Бојан и Ѓорѓи се познавале долги години, а нивните татковци биле другари од мали, па поради тоа, родителите на Ѓорѓи посакале името на нивниот прерано починат син, но и неговата љубов кон музиката да продолжат да живеат преку вештите раце на Бојан.

Младиот музичар, за CRNOBELO.com, раскажа за емотивната средба со мајката и таткото на Ѓорѓи, кои му го подарија тапанот:

„Јас тропав на тапан од дете на фамилијарни веселби, и во основно училиште и во оркестар во гимназија. Со Ѓорѓи се познававме одамна, бевме многу блиски. Мојот татко и татко му на Ѓорѓи се другари од мали.

Сме свиреле заедно на свадби во Струмица, тој ме зеде со него и ми беше многу мило кога ме викна, бев горд на тоа.

Идејата на неговите прекрасни родители да ми го подарат тапанот произлезе, можеби од тоа што пред скоро една година, за мојата полуматура, јас имав желба да тропам со неговиот тапан и Ѓорѓи тогаш од срце ми го даде.

И секогаш кога ми требаше, тој ми го даваше тапанот и секогаш ми беше голема поддршка.

Како изгледаше средбата со нив кога го донесоа тапанот? Ова е најтешкото прашање за мене.

Средбата со нив беше многу тешка.

Прво, татко му Драги ми го даде тапанот во раце со солзи во очите и ми кажа: ‘Бојанче, ти го давам тапанот со една цел - да продолжиш по патот на музиката со тапанот на мојот Ѓорѓи кој е ангел на небото и да не престанат да одекнуваат звуците од овој тапан’, па силно ме прегрна.

А неговата мајка Зорица ми пријде и кажа ‘Ѓорѓи нека свири преку тебе’ и силно ме гушна.

Веќе и свирев на тапанот - пред неколку дена, благодарение на неговите родители и нивен близок пријател, музичарот Стојчо Гогов, ме зеде на свадба да свирам со неговите музичари.

Премногу ми значи затоа што Ѓорѓи беше цар за тапани и што баш неговиот тапан, колку и да е жално и болно, ми припадна мене.

За ова сум многу благодарен на неговите прекрасни родители“.

©CRNOBELO.com Забрането преземање и копирање. Крадењето на авторски текстови е казниво со закон.

А. Ј. | Црнобело / фото: Приватна архива