Тапанарот од ДНК и фотографот на бендот меѓу починатите во дискотеката во Кочани

Детали

недела, 16 март 2025

„Ќе свириме горе кога ќе се најдеме“, напиша Ивона Јо во последниот поздрав до тапанарот Ѓорѓи Горѓиев.

Ѓорѓи Горѓиев од Струмица, кој беше тапанар во бендот на ДНК и фотографот Александар Ефремов, кој ги следеше Андреј и Панчо на скоро сите настапи низ државава, се меѓу загинатите во пожарот што се случи во дискотеката Пулс во Кочани.

Во трагичниот настан, досега е потврдено дека загинаа 59 лица.

Нивните пријатели, во неверување, се простуваат на социјалните мрежи.

„Ќе свириме горе кога ќе се најдеме“, напиша Ивона Јо во последниот поздрав до Ѓорѓи.

„Ќе играме кантер таму горе. Другарчино. Ќе фалиш премногу“ - стои во последниот поздрав од Антониа Гиговска до Александар.  

Меѓу починатите е и уште еден член на бендот на ДНК - Филип Стевановски.

Стевановски беше продуцент, пијанист, тромбонист и композитор, магистар по џез науки, а вработен беше како професор во Државниот музички училишен центар (ДМУЦ) „Сергеј Михајлов“ - Штип, стои во објава на Инстаграм профилот „Кумановски муабети“.

Веста за неговата трагична смрт е потврдена од штипската телевизија Стар.

Во пожарот загина и Сара Пројковска која беше придружен вокал на ДНК, а воедно и професрока на Факултетот за музичка уметност, од каде ја потврдија веста за трагедијата.

А. Ј. | Црнобело