„Мислев дека сум посвоена бидејќи мајка ми починала – дознав дека ме купиле на црно“

Детали

сабота, 27 јуни 2026

Канаѓанката Дијана знаела дека нејзината биолошка мајка починала кога била дете, па затоа за неа се грижеле луѓето што ја посвоиле. Но, сосема случајно, таа открила многу помрачна вистина – нејзината мајка имала 17 години кога ја родила, па ја продала на родителите што се грижеле за неа.

Луѓето кои биле посвоени е нормално да посакуваат да дознаат нешто за нивните биолошки родители.

Иако родителите што ги посвоиле и се грижеле за нив ги гледаат како свои родители, очекувано е бидат љубопитни за своето потекло.

Дијана Хошберг од Канада знаела дека е посвоена и мислела дека нејзината биолошката мајка починала додека таа била многу мала.

Но, вистината што ја открила Дијана, која денес има 70 години, била многу, многу помрачна – таа била продадена и целиот нејзин живот всушност бил лага.

„Едно е тоа што открив дека сум посвоена. Но, тоа што дознав дека нема документи или мој извод на раѓање што е вистински беше нешто сосема поразлично. Бев во шок.

Родителите што ме посвоија ме одгледаа и ги сакам, тоа никогаш не се промени. Она што ме измачуваше беше таинственоста. Додека растев, немав поим колкав дел од мојата историја е скриен од мене.

Како што учев повеќе за црниот пазар за бебиња, помалку се фокусирав на луѓето што ме одгледаа, а повеќе на системот што го направил сето ова возможно.

Јас не сакам да обвинувам никој, туку само сакав да го откријам делот од мојот идентитет кој ми бил украден уште пред да постојам“, раскажува Дијана за британскиот The Sun.

Сè до април 1993 година, Дијана имала генерално нормален живот. Споделува дека ја дознала мрачната тајна додека била на вечера со нејзиниот син Дејвид и нејзиниот пријател Мени.

Мени често доаѓал на гости во домот на Дијана додека била мала, но откако починале татко ѝ и мајка ѝ, се гледале поретко.

Додека разговарале, Мени ѝ кажал нешто што засекогаш ѝ го променило животот.

„Ми рече дека било тажно што никогаш не сум ја сретнала мајка ми, а ова ме збуни. Таа почина кога имав десет години.

Не го разбирав што сака да каже, па кога ме праша дали сакам да ми помогне да ја најдам, почнав да се тресам. Веднаш му се јавив на брат ми за да ја откријам вистината“.

Брат ѝ ѝ предложил да го побара нејзиниот извод од раѓање, а Дијана тогаш сфатила дека всушност никогаш си го нема видено изводот.

Во меѓувреме почнала да се распрашува по роднините, но вели дека останала со повеќе прашања отколку одговори.

„Еден роднина проба да ја смени темата и ми го спушти телефонот. Друг ми рече дека морал да зборува со адвокат пред да ми одговори нешто“.

По околу шест месеци, Дијана стапила во контакт со маж од Канада кој ги знаел нејзините родители.

Тој ѝ раскажал за млада девојка, Дона, која забременила на 17 години, но бидејќи не можела да се грижи за детето, направила „таен договор“ со родителите што ја посвоиле.

По ова, успеала да допре до информации за нејзината биолошка мајка, но тогаш дознала дека таа починал на 30-годишна возраст.

Сепак, Дијана вели дека уште пробува да утврди дали ова е вистина.

„Немам поим колку пари ѝ дале за мене. Но, знам дека немала други деца. Не ја обвинувам за тоа што го направила.

Веројатно тоа било најдобро за сите и моите родители – тие што ме посвоија – беа многу добри со мене. Само посакувам да имав шанса да ја запознам“.

Дијана вели дека е благодарна што конечно ја дознала вистината, а нејзиното искуство ја мотивирало да напише и книга.

Книгата е издадена во 2025 година, а Дијана се надева дека со неа ќе ги охрабри и другите да ја откријат вистината за себе.

Истовремено уште пред да ја напише книгата, таа им помага на луѓе кои се посвоени да се поврзат со нивните семејства.

Спирова С. | Црнобело