Емотивно видео: Хигиеничарка на зграда во Њујорк се расплакува откако станарите ќе ѝ подарат стан

Детали

четврток, 21 јануари 2021

Сакајќи да ѝ се заблагодарат за сè што направила за нив, станарите од една зграда во Њујорк ѝ приредиле неверојатно изненадување на хигиеничарката што работи таму, откако останала во лоша финансиска состојба.

Роза е хигиеничарка од Њујорк на која поради пандемијата, ѝ се намалил обемот на работа, а со тоа и приходите. Нејзината финансиска состојба се влошила до тој степен, што морала да почне да живее со сестра ѝ. Но, станарите од една зграда во којашто чисти одлучиле да ѝ помогнат, но и да ѝ се заблагодарат, така што изнајмиле цел пентхаус за неа на две години, додека да се стабилизира нејзината финансиска состојба.

Тие направиле и видео од целиот настан, кое на Фејсбук има над 700.000 лајкови.

„Ова е Роза. Таа го изгуби работното место поради пандемијата и живее кај сестра ѝ. Таа работи во оваа зграда 20 години! Сите ја сакаат! Па, одлучивме да ѝ дадеме нешто на жената која им дава премногу на сите други. Таа не знае што се случува. Сега, таа ќе добие пентхаус“, пишува на почетокот од видеото, додека Роза оди до пентхаусот со лифт.

Двајцата мажи кои се појавуваат во видеото ѝ рекле на Роза дека ќе оди во пентхаусот за да го исчисти, пред да им го покажат на потенцијалните купувачи. Како што влегуваат внатре, Роза е видно воодушевена од огромниот стан, а мажите почнуваат да ѝ покажуваат наоколу.

Најпрво Роза се вљубува во кујната, изјавувајќи:

„Се надевам дека станарите ќе сакаат да готват, бидејќи оваа кујна е совршена“.

Потоа, двајцата мажи ѝ го покажуваат балконот, а Роза додава:

„Овде може да се стави телескоп“.

Кога завршуваат со турата низ станот, едниот од мажите почнува да ѝ зборува на Роза:

„Знам дека многу луѓе во зградата те сакаат. На некој начин, ти си ѕвезда во оваа зграда. Знам дека годината беше тешка за тебе и твоето семејство. Но, имаш огромно позитивно влијание врз луѓето во оваа зграда, и тие само сакаат да ти дадат нешто за возврат“.

Тогаш мажот ѝ го покажува договорот, велејќи дека целиот стан е нејзин, трошоците за наредните две години се покриени, а таа само треба да се потпише и да ги земе клучевите.

На крајот, Роза почнува да плаче и успева да изусти само една реченица:

„Ова е премногу, не ми се верува“.

Агентот, пак, ѝ вели дека сето е заслужено.

Спирова С. | Црнобело