Хумористичен хороскоп: Какви се знаците веднаш по будењето - кој е подвижно „зомби“, а кој спремен за акција?

Карактерот на хороскопските знаци го открива начинот на кој секој од нив го започнува утрото и оди во нови победи.

Еве како изгледа будењето на астролошките знаци, односно колку знаци се подготвени за новиот работен ден, а кој прв се фаќа за телефонот или огледалото.

6 часот – Девицата се буди прва и пред туширањето ја чисти бањата. Откако ќе ги измие забите, си ја става четката во стерилизирана кутија на посебно место, подалеку од четките за заби на сите останати.

6 часот и 15 минути – Јарецот станува и веднаш го исклучува бојлерот, бидејќи се ближи времето кога евтината струја ќе прекине.

6 часот и 20 минути – Водолијата оди на утринско трчање.

6 часот и 30 минути – Вагата и Лавот се пред огледалото и почнуваат да се расправаат за хидратантниот крем и гелот за коса.

6 часот и 40 минути – Бикот појадува чоколаден крем со голема лажица за супа.

6 часот и 45 минути – Стрелецот се буди и повторно го вклучува бојлерот.

7 часот – Ракот подготвува сендвичи, Девицата цеди свеж сок. Близнаците се сè уште во креветот и си ги проверуваат сите друштвени мрежи на телефоните.

7 часот и 5 минути – Скорпијата ја крши вратата од тоалетот. Вагата полека излегува, смртно навредена, со огромен несесер во рацете.

7 часот и 10 минути – Се буди Овенот и вклучува штоперица.

7 часот, 11 минути и 45 секунди – Овенот е веќе истуширан, облечен, дотеран, се симнува по скалите и насмеано мавта. Ја исклучува штоперицата со која го мереше времето.

7 часот и 15 минути – Бикот го гребе дното на теглата со лажицата. „Нема повеќе крем“, тажно констатира.

7 часот и 20 минути – Вагата и Лавот повторно имаат тепачка пред огледалото, последни проверки во кои секој се воодушевува на сопствениот изглед.

7 часот и 30 минути – Водолијата се тушира со ладна вода, Јарецот повторно го исклучил бојлерот.

7 часот и 40 минути – Сите си заминуваат.

7 часот и 45 минути – Близнаците се враќаат, едниот од нив го има заборавено телефонот од вкупно 3 што ги поседува.

7 часот и 50 минути – Близнаците повторно се враќаат, сфатиле дека си го заборавиле паричникот.

8 часот – Рибите се будат и сфаќаат дека сите се веќе излезени, а тие се сами и заклучени во куќата.

(О)Милена | Црнобело