„12 величествени“, „М2 потрага по ѕвезда“: Гламурозни манифестации кои не постојат, а би сакале да се вратат

„М2 Потрага по ѕвезда“

Музичката продукција М2 на Дарко Димитров и Иво Јанковски го имаше еден од најуспешните музички проекти кај нас – натпреварувањето во кое се избираше ѕвезда или неколку ѕвезди одеднаш.

Младите таленти се пријавуваа на аудиција, потоа минуваа неколку кругови, за на крај, финалистите да добијат своја песна и со неа да пеат во финалето, кога публиката и жирито гласаа за најдобриот.

Иако траеше само неколку години, со овој проект се прославија некои од најпопуларните македонски музичари кои се активни и денес.

Елена Ристеска е прв победник на шоуто, а по неа победи Ламбе Алабакоски.

Кога „М2“ бараше соѕвездие, на натпреварот победија 4Play.

Но, меѓу оние кои привлекоа внимание со учеството во М2 се и Туна Сејдиу, Александра Пилева, Бојана Скендеровски, Сања Лефкова, Емил Арсов, Сара Маркоска и многу други.

„Скопски фестивал“

Еден од првите музички фестивали кај нас е Скопски фестивал кој првпат се одржал во 1968 година и продолжил до 1980.

Во ова кратко време, фестивалот бил еден од најголемите музички настани во Југославија и тука настапувале најголемите југословенски ѕвезди.

Фестивалот е возобновен во 1994 година, а музичарите на почетокот пееле придружувани од оркестарот на МРТ.

На овој гламурозен настан неколкупати се избираше и македонскиот претставник за Евровизија.

Прв македонски претставник кој се избра на фестивалот беше Владо Јаневски, кој во 1998 година победи со песната „Не зори зоро“.

И покрај огромната популарност, фестивалот последен пат се одржа во 2015 година, а тогаш победи дуото „Eye Cue“ со песната „Убава“.

А. Ј. | Црнобело