Како да си го разубавите вашето утро?

Велат „по утрото денот се познава” и навистина е така, едно пријатно утро ни претставува одредена гаранција за одличен ден.

Како да го разубавите вашето утро, а со тоа и вашето секојдневие?

Обидете се да се разбудите од 45 минути до 1 час порано од времето кога ви започнуваат обврските

Будењето 15 минути пред да излезете од дома ја зголемува веројатноста да брзате, а со тоа поради обврски, паниката да ви чукне пред врата. 

Можете да станете нервозни поради најмала ситница. Едно испаничено утро може да донесе непријатни емоции кои можат да се провлекуваат во текот на целиот ден. Поради тоа, зграпчете го денот порано.

Вежбајте

Не мисламе на целосна гимнастика, но мало раздвижување на телото е сосема добредојдено. Секој спие во различна позиција, на различен кревет и неретко знаеме да се разбудиме вкочанети, а и природно е после долга состојба на лежење телото да бара мало раздвижување.

Вежбите за истегнување на рацете и нозете можат да бидат мал обид да го вратите телото во форма.

Утринско кафе

Нема подобар утрински ритуал од пиењето на црно кафе. Кафето ги буди вашите сетила и делува на вашата будност, ако не физиолошки, психолошки сигурно.

За оние кои не пијат кафе, шолја чај или чаша сок од омиленото овошје, може да ви го разубави утрото преку пријатен вкус и мирис на она што го консумирате.

Појадок

„Појадокот јади го сам, ручекот подели го со пријателите, а вечерата дајте им ја на непријателите”. Зарем треба уште нешто да се кажува за значењето на појадокот кој е основен оброк во денот? 

Музика

Некои истражувања укажуваат на позитивната промена кај личноста при слушање на омилената музика.

Започнете го утрото со омилената песна и при секое потпевнување на рефренот, сетете се дека животот е убав.

Набљудувајте го денот

Ова е можеби една од првите нешта кои ги правиме веднаш откако ќе отвориме очи. Почувствувајте сè, почувствувајте го своето тело, своите потреби, погледнете низ прозорецот, насмевнете се со благодарност за новиот ден.

Разменете некоја мисла со блиските

Блиските луѓе, семејството и пријателите се оние кои можат најмногу да не развеселат, но и да не растажат.

Убаво е кога утринското кафе би го пиеле со свој близок или доколку ја немате таа можност, слушнете се по телефон или испратете некому порака за убав ден.

Н. Т. | Црнобело