Клои Кардашијан мета на критики откако го покажа совршеното тело: Зошто јавноста ја осудува што и да направи?

Детали

петок, 02 мај 2025

Со неколку Инстаграм фотки, Клои Кардашијан покажа дека го довела телото до совршенство. Но, како што ја критикуваа за вишокот килограми, сега ја осудуваат дека била преслаба. Зошто Клои постојано е мета на критики, што и да направи?

Сестрите од кланот Кардашијан-Џенер се меѓу најпознатите жени во светот, па нормално е покрај бројните фанови, да имаат и „хејтери“.

Но, од сите нив, се чини дека Клои Кардашијан се соочува со најмногу критики и без разлика што ќе направи, јавноста ја осудува.

Неодамна, Клои сподели неколку фотки на Инстаграм со ќерката Тру и синчето Тејтум и покажа дека го довела телото до совршенство. 40-годишната ријалити ѕвезда гордо позира во бикини и го покажува мускулестото тело.

Иако Клои изгледа навистина добро и е очигледно дека напорно вежбала за телото од соништата, во коментари повторно се соочува со критики – исто како што ја критикуваа и за вишокот килограми.

Додека некои фанови ѝ се восхитуваат, голем дел од следбениците коментираат дека била премногу слаба.

„Што е со стомачните?“

„Треба да намалите со Оземпик“.

„Сите се опседнати да бидат слаби. Не е здраво. Клои изгледаше подобро претходно“.

„Ми личи како да има проблеми со здравјето“.

Дел од фановите, пак, ги критикуваат хејтерите:

„Луѓето кои велат дека изгледала подобра со облини сигурно ја критикуваа кога имаше облини. Многу сте чудни“.

Клои многупати има зборувано за битката со вишокот килограми, но вели дека не ги гледала како проблем, сè додека јавноста не почналa да коментира.

„Имав огромна самодоверба. Бев полничка, си носев тесни фустани и не ми беше гајле. Јавноста ми ја создаде несигурноста“, има изјавено Клои во интервју.

„Од мигот кога се појавив на телевизија, бев распната. Не изгледав како моите сестри, па не бев доволно добра.

Тогаш почнав да си го менувам изгледот – да учам да се шминкам, да ставам филери, направив операција на носот и луѓето уште ме критикуваат“.

Не само вишокот килограми, Клои честопати била нарекувана и грда што дополнително ја натерало да си го менува изгледот.

Поради ова, почна и многу да ги уредува нејзините фотки, па на дел од нив воопшто не личи на себе. А, и за ова се соочува со критики.

Клои има изјавено дека секој недостаток што не ѝ се допаѓал кај неа, бил детално анализиран од јавноста, што ја терало уште повеќе да го мрази својот изглед.

Целото лошо искуство ја натерало не само да направи драстични промени кај себе, туку и да биде многу позаштитнички настроена кон ќерка ѝ Тру.

„Тру е многу висока. Па, кога некој ќе рече дека многу била голема, јас го поправам ѝ велам - висока. Знам што сакаат да кажат кога велат ’голема‘, но не сакам Тру да го сфати тоа погрешно.

Кога е во прашање храната, имав многу проблеми. И ова не потекнуваше од само една личност, туку од јавноста и тоа што сите го критикуваа моето тело. Па, не дозволувам Тру да се соочи со ова“.

Клои вели дека вежбањето ѝ станало вид терапија.

„Кога бев помлада, ако бев тажна, јадев. И потоа се мразев. Како да се казнував ако изведев многу и нема диета што не сум ја пробала.

Почнав да вежбам кога се разведував (од Ламар Одом) и по некое време почнав да се чувствувам подобро“.

Клои вели дека дури и откако го добила телото од соништата, уште ја погодуваат злобните коментари.

„Никогаш не можете да се навикнете на коментарите дека не сте атрактивни, а ако слушате нешто многу често, почнувате да верувате во тоа. Јас сум условена да се чувствувам така, дека не сум доволно убава“.

Клои се сочувала со критики за вишокот килограми и од нејзината мајка, а ова ја натерало да го смени пристапот кон мајчинството.

„Мајка ми отсекогаш нè дотерувала, ни ја средувала косата. Јас сакам да им дадам слобода на моите деца да се изразуваат и да не им создавам притисок со перфекционизам“.

И покрај многуте критики низ годините, Клои има и безброј фанови кои сметаат дека од целото семејство, таа е „најнормална и најприземјена личност“.

Ова се гледа и на коментарите од Инстаграм објавата во која го покажува новото тело:

„Сакам Клои да ми биде најдобра пријателка“.

„Изгледаш многу силно и здраво Клои!“

„Фризурата ти стои одлично“.

„Колку убави мајка и ќерка!“

„Ако изгледав вака добро во бикини, и јас ќе ги носев со патики, како тебе“.

Спирова С. | Црнобело