Животот не е живот, ако не го изживееш онака како што ти сакаш

Еден ден ќе се одважам и ќе преземам контрола врз сопствениот живот. Прво ќе дадам отказ од работното место.

Отсекогаш сум се замислувала во две филмски, по малку банални ситуации - жена излезена од супер маркет со багет во хартиена кеса (делува како да си парижанка) или картонска кутија која ја носиш во раце, со саксиско растение, пенкала, нотеси и хефталката за спомен при збогување со работното место.

Првото го остварив, а другово – кога ќе се одважам. Бидејќи животот е краток и не вреди да го трошиш на работа која те прави целосно несреќен.

Еден ден ќе се одважам и нема да одам на сите детски родендени во игротеки. Се радувам за дечињата, но се чувствувам како непотребен вишок, а и целата таа збрка ми е по малку хаотична и бесмислена. Да, ве сфаќам, ви ги сфаќам сите практични и финансиски аргументи за славењето во игротека. И да, можеби еден ден и јас ќе ви упатам покана за слична таква прослава, на слична таква локација. Но, дотогаш, нема да доаѓам.

Бидејќи не ми е местото таму, а таму каде што не припаѓаш нема потреба да одиш.

Еден ден ќе се одважам и нема пристојно да се смеам кога некој ќе ми рече дека секој потајно слуша турбо фолк. Не слушаат сите турбо фолк! Не лажете се, не се самоубедувајте. Слушајте си што ви е по волја и не срамете се од сопствените избори. Бидејќи не е добро да ги наметнувате вашите вкусови на туѓи апетити.

Еден ден ќе се одважам и на сите кои ме повредиле ќе им дадам до знаење дека не останало незабележано во тефтерот, но и дека им простив. Бидејќи животот кој се храни од омраза е бесмислен.

Еден ден ќе се одважам и ќе ги остварам и доживеам сите работи од кои се плашам, макар некому се чинеле глупави. Едноставно ќе ризикувам, ќе грабам и туркам, со солзи и насмевки, со стиснати заби и непоколеблива решителност...

Бидејќи што е животот, ако не го изживееш онака како што ти сакаш?

©CRNOBELO.com Забрането преземање и копирање. Крадењето на авторски текстови е казниво со закон.

(О)Милена | Црнобело