Девојките понекогаш сакаат и да го слушнат тоа што го чувствуваш за нив сине

Веројатно го препознавате името на Џон Стајнбек како еден од најзначајните американски автори. Тој е добитник на Пулицеровата награда за романот „Плодовите на гневот“, а „Источно од рајот“ и „Глувци и луѓе“ се само дел од култните дела на овој талентиран писател.

Но, она што веројатно не го знаете за овој „гигант на американските букви“ е писмото адресирано до неговиот син, по повод вљубувањето на Том во одредена девојка.

Тоа е топло, искрено и емотивно четиво кое ќе ве разнежни. Советот на еден татко кој зборува со својот син за љубовта е веројатно ретка конверзација помеѓу двајца мажи од ваков тип.

Ви го пренесуваме онака како што Стајнбек го напишал и верувајте дека вреди да се прочита:

Њујорк
10 ноември 1958 година

Драг Том:

Утринава го добивме твоето писмо. Ќе се обидам да ти одговорам онака како што јас мислам, а Илејн ќе ти одговори според нејзиното мислење.

Како прво – ако навистина си заљубен – тоа е многу добро – всушност, тоа е најдоброто нешто што може да му се случи на човек. Не дозволувај некој да го уништи или омаловажи тоа твое чувство.

Како второ – Постојат неколку видови љубов. Човекот може да биде себичен, суров, алчен, егоистичен и да ја искористува љубовта само од суетност. Ова е најлошиот вид на љубов кој го осакатува човекот.

Другиот вид на љубов е љубов која го вади на површина сето она што е најдобро во врска со тебе – љубезност, внимание и почит кон другиот  - не само од социјален аспект на однесување, туку поголема почит со која на другиот гледаме како на единствена и драгоцена личност.

Првиот вид на љубов може да те разболи и омаловажи, додека вториот вид на љубов може да ти даде слобода и сила, да те охрабри да правиш добри работи, па дури и да ти даде мудрост каква што си мислел дека не поседуваш.

Велиш дека ова не е само затресканост. Ако толку силно чувствуваш дека ова е навистина љубов – се разбира дека не е само затресканост.

Но, мислам дека ти не ме прашуваш за она што ти го чувствуваш. Тоа го знаеш ти самиот подобро од кој било. Она што го бараш од мене е да ти помогнам како да постапиш во врска со тоа – а јас да ти го кажам одговорот.

Уживај во љубовта и биди благодарен што си ја пронашол.

Вљубениот човек има најдобри и најубави намери. Обиди се да бидеш достоен за таква љубов.

Ако љубиш некого – нема ништо лошо во тоа да кажеш дека си заљубен – само запомни дека некои личности се многу срамежливи и понекогаш тоа треба да го имаш предвид.

Девојките најчесто можат да препознаат или да го почувствуваат она што ти чувствуваш за нив, но тие сакаат и да го слушнат тоа.

Понекогаш се случува чувствата да не ти бидат возвратени од една или друга причина – но тоа не прави твоите чувства да бидат помалку важни и добри.

За крај, знам точно како се чувствуваш, затоа што и јас го имам истото чувство и многу ми е мило поради тоа.

Многу би сакале да се запознаеме со Сузан. Добредојдена е. Но, познавајќи ја Илејн знаеш дека таа ќе сака да се погрижи за сѐ и ќе ѝ биде многу мило. И таа знае како е да си вљубен и можеби ќе ти помогне многу повеќе отколку јас.

И не се грижи дали ќе ја загубиш. Ако е онаа вистинската, ќе се случи – најдобро е само да не брзаш. Ништо добро не може да излезе од тоа.

Со љубов,

Тато

(O)Милена | Црнобело