Не плачете за матурата дечки, животот е суров и полн препреки, за ова не вреди да се пушти ни солза

Пред некој ден наидов на статија со интервјуа на 18-годишни матуранти кои ги искажуваат своите ставови во врска со незавршената учебна година, последната во средното образование и секако, мислењата во врска со матурската прослава.

фото: depositphotos.com

Генерално сите изразија жалење што не успеале да ја завршат четвртата, последна година од средното со своите другари од класот, што е секако основано.

Не е едноставно убаво да се разделиш со другарот од клупа, со тие што ти се драги од класот, па дури и со дел од професорите, без никаков поздрав.

Сепак, добрата страна е што секогаш може да ја остварите оваа средба подоцна. Година дена по матурирањето или на јубилејните прослави. А со многумина од класот веројатно постојано сте и во контакт, се гледате или се слушате.

Последната интервјуирана девојка изјави дека и покрај ситуацијата сепак ѝ олеснило што нема да има матурска прослава. Зошто? Бидејќи нема да се соочи со целиот притисок во потрага по совршениот фустан, илјада и една проба за истиот, па каде ли да се закаже за шминка и фризура, па за маникир и педикир, па чевлите, па чантата, една безумна трка со времето во која се истураат пари и пари.

Искрено, и на многу од родителите им олесни, иако нема можеби отворено да ви го признаат ова. Едноставно, колку и да се радуваш за своето дете и неговиот успех, не си подготвен да истуриш безумна сума на денари за најобична матура.

Бидејќи да не се лажеме, не е некој невиден успех. Си го завршил задолжителното, повторувам – задолжителното средно образование во државава.

Да, ова е лошо време. И сите нè дочека неподготвено. Во паника сме, во страв што ќе ни донесе иднината и како ќе го преживееме овој месец, следниот по него … или пак што ќе нè снајде до крајот на годината. И сега можеби ова ви изгледа како најголема казна – нема матурска прослава.

Но верувајте, не е трагедија и не е крајот на светот. Животот е комплициран, грд и суров и ќе се соочите со толку многу препреки. Недостатокот на официјално крунисување на 4-годишното средно низ една помпезна прослава која потсетува на свадба без невеста не треба да ви биде причина за нервоза или фрустрација. Продолжете да си кроите планови за иднината и радувајте му се на животот.

И верувам, дека кога ќе заврши сето ова лудило, ќе си направите многу подобра, неформална забава со сите оние што ги сакате за да го прославите крајот на средното образование и почетокот на новата фаза од животот. Нешто што нема да потсетува на таа парада на кичот, со пластична атмосфера, лоша музика и ладни пирошки.

©CRNOBELO.com Забрането преземање и копирање. Крадењето на авторски текстови е казниво со закон.

Автор: (О)Милена | Црнобело