Во новата година, ти посакувам да научиш да кажуваш „НЕ“

Дали си уште од оние „будали“ што не ја научиле магијата на зборчето „не“, од пусти страв за да не ти се налути некој? Доколку си, здраво пријателе, и јас сум таква будала.

За тебе и за себе, во новата година посакувам да ја совладаме оваа едноставна вештина на кажување НЕ. Толку кратко и јасно, цели две букви.

НЕ, на сите оние на коишто им ги позајмуваш последните пари што ги имаш, а потоа се преправаат дека не ти должат ништо во следните 2 години од животот. Па ти е незгодно да си ги побараш своите пари назад.

НЕ, на сите што упорно те викаат на дружба само за да трубат за своите проблеми, а во моментот кога ти сакаш да кажеш што те мачи, магично испаруваат затоа што мораат итно на некое друго место.

НЕ, на оние кои ти ја цедат енергијата, креативноста и насмевката, а подоцна се китат со твоите пердуви.

НЕ, на пасивно-агресивните луѓе што постојано те задеваат со коментари од типот – „Уште немажена? Ама си се здебелила малку, м? Што, се разведе после само 2 години брак? Уште немате дечиња?“ Зошто ни се потребни вакви луѓе во животот?

НЕ, на луѓето на кои постојано им се наоѓаш за услуги, а тие еднаш не го кренале телефонот да прашаат како си.

НЕ, на токсичните и љубоморните кои едвај чекаат да ви се случи нешто лошо, за да се ситат, да се споредуваат со вас, за да на крај си речат – па барем не сум како неа/него!

НЕ, на љубовта која не ви е возвратена, на оној кому сте му заложник, кој ве третира како играчка, како кукла на навивање, без да се грижи за вашите чувства кои ги гмечи со ѓонот од чевлите.

НЕ, на оние кои ве изневериле, кои бараат трета, четврта и петта шанса, и покрај првите две. Тие никогаш нема да се сменат и време е да си продолжиме понатаму.

НЕ, на стравот од одбивање, на стравот дека некому нема да му бидеме добри, интересни и фини.

НЕ, на сите бесполезни дебати во друштво за политики, вакцини, корони и што веќе не. Никој од нас нема да си го смени мислењето, зошто ни се сите тие крволочни дебати и беспотребно ситнење на енергијата?

НЕ вреди. НЕ вреди да се трошиме на сите овие луѓе, случки и настани, додека нашето здравје и нерви се на штица за сечкање. Не вреди да се полниме со стрес и горчина. Еден си е животот. Само нему и себеси, кажете си ДА.

Содржината и ставовите изразени во авторските текстови и колумни претставуваат лични ставови на авторот и не мора нужно да ги одразуваат ставовите на редакцијата на порталот CRNOBELO.com

©CRNOBELO.com Забрането преземање и копирање. Крадењето на авторски текстови е казниво со закон.

(О)Милена | Црнобело