„И на твоја глава“, „Дојди да те запознам со тетките“ - Што најмногу ги нервира Македонците на свадби и детски родендени?

А тебе кога ќе те жениме/мажиме?“, „Ти поминуваат годините, ајде кога ќе имаш деца?“... Многу луѓе да можат би ги избегнале и свадбите и детските родендени - поздравувањето со гостите, сечењето торта, играњето оро, дружењето со роднини со кои се гледаме еднаш во три години (па и повеќе).

Дали ви пречат прашањата од типот: „А тебе кога ќе те жениме/мажиме“, „Ти поминуваат годините, ајде кога ќе имаш деца“? Признајте, не можете да останете рамнодушни на ваквите коментари.

Некои работи поврзани со свадбите и детските родендени, едноставно, ве вадат од такт.

Ги прашавме Македонците преку анкета на Инстаграм што најмногу ги нервира кога одат на свадби и детски родендени.

Прочитајте, па кажете ни дали се сложувате со нив? Што ве нервира вас?

Дел од одговорите:

1. Ако нема пирошки на свадба!

2. Ме нервира кога почнуваат да ме прашуваат кога јас ќе правам свадба и дали планирам деца.

3. Луѓето што не се веселат – зошто се тогаш дојдени на свадбата?

4. Децата што „кенкаат“, плачат на цел глас, трчаат наоколу и им пречат на другите гости.

5. Кога ќе ми речат „Дојди да те запознаам со тетките“.

6. Лицемерието на некои луѓе дојдени на свадбата/роденденот.

7. Ме нервира кога невестата или мајката на детето што слави роденден ќе излезе надвор со цигарата в рака.

8. Ме нервира тоа што сите жени ме прашуваат како се средени.

9. Што се трошат пари за небитни работи.

10. Вриштењето на децата и роднините со прашање: „А ти што чекаш“?

11. Кога некоја личност се мести на сите фотографии, како без неа да не може да помине фотографирањето.

12. Мразам да одам и на свадби и на детски родендени.

13. Тоа што со часови мислиш што да облечеш, а потоа седнуваш на маса и со часови се досадуваш.

14. Ме нервира поздравувањето со сите гости.

15. Кошмар ми е кога ќе речат „Ај, па и на твоја глава“.

16. Ме нервираат невоспитаните деца и родителите што се прават дека не ги забележуваат.

17. Фотографирањето со цели фамилии.

18. Кога не им се битни луѓето што им доаѓаат, туку подароците што ги добиваат.

А. Ј. | Црнобело