Како да им дадете „втор живот“ на старите перници?

Ако имате куче или маче, старите перници може да ги искористите да направите одлично легло за нив. За што друго можете да ги искористите старите перници кои не се погодни за спиење?

Во зависност од тоа со што се полнети и колку добро се одржуваат, перниците траат во просек од две до три години. Најчесто по овој период, постојат неколку работи кои покажуваат дека време е да ги замените со нови.

На пример, ако перниците не ви ја држат добро главата при спиењето и вие почнувате да имате болки кога ќе се разбудите наутро, тоа е еден од знаците дека веќе не се за користење.

Уште еден јасен показател дека време е да ги обновите вашите перници, е тоа кога тие ќе почнат да пожолтуваат, а тоа најчесто се случува поради пот, средства кои претходно сте ги нанеле на косата, влажна коса и слично.

Ако, пак, почувствувате дека во перниците се создаваат грутки кои се тврди на допир, тогаш дефинитивно треба да се одлучите за нови.

Откако ќе им помине рокот на траење и ќе ги замените со нови, не мора да ги фрлате старите перници, туку можете да ги пренамените и да им дадете „втор живот“

Неколку идеи кои може да ви послужат како одлична инспирација:

Направете декоративна перница

Ако перницата е тврда на допир и се создале грутчиња, тогаш може да ја отшиете, да го извадите полнењето и да го ставите во нова навлака и да направите декоративни перничиња.

Направете перничиња за во двор

Слично на претходната идеја, извадете го полнењето од перницата и додајте го во мали навлаки кои ќе ви се вклопуваат на столот или гарнитурата за во двор, а може да направите комбинација од две или три перници.

Одозгора додајте материјал отпорен на вода и уживајте во вашето ново дело.

Направете креветче за вашето милениче

Ако имате куче или маче, старите перници може да ги искористите да направите одлично легло за вашите крзнени пријатели.

Обновете ги старите меки играчки

Едноставно извадете го полнењето од перниците и додајте го во некои стари играчки кои веќе го изгубиле нивниот сјај.

Направете си перница за патување

Ако вие и вашето семејство патувате често, тогаш искористете ги старите перници за да го направите следното патување уште поудобно. Извадете дел од полнењето и направете навлака во буквата U, па наполнете ја.

Претворете ја во торба за пазарење

Отворете ја перницата, извадете го полнењето и искористете ја преостанатата ткаенина за да создадете торба.

Лесно е, не бара многу труд и време, а доволно е тенка за да ја собере и во вашата чанта при што можете и да пазарувате со неа.

М. Ѓ | Црнобело / фото: freepik.com