7 работи со кои модерните жени се „опседнати“, но нашите баби ги игнорирале

Совршен маникир и педикир, безброј активности за децата, „вечен“ младешки изглед – некои работи што нам ни се особено важни, нашите баби, едноставно, ги игнорирале.

Животот на нашите баби бил многу поразличен од нашиот, и тоа од речиси секој аспект.

Имале други стандарди за убавина, други приоритети, други сфаќања…

Работи кои нашите баби ги игнорирале, а ние сме како опседнати со нив:

Третмани за разубавување и подмладување

Денес третманите со ботокс, филери и слично се норма.

За оние кои не ги сакаат овие процедури, има безброј други третмани за разубавување со маски, ласери и што уште не.

Додека многу модерни жени се опседнати со младешки изглед, нашите баби ги прифаќале своите брчки и не им било приоритет цел живот да изгледаат како 20-годишни девојки.

Безброј активности за деца

Во ред е што денес родителите се позагрижени за развојот на децата, но некогаш ги преоптоваруваат со вонучилишни активности.

Неретко модерните родители како да се натпреваруваат едни со други за тоа кое дете ќе научи да чита побрзо, ќе научи англиски порано или ќе решава математички задачи за повисоки одделенија.

Нашите баби и дедовци, па и нашите родители, само гледале да си ги завршиме училишните обврски, а потоа нè оставаа да си играме надвор додека да падне ноќ.

Разговор со психолог или психијатар

Ова дефинитивно е една од убавите разлики бидејќи сега повеќе се посветуваме на менталното здравје.

Кога нашите баби (и дедовци) се соочувале со проблеми како анксиозност и депресија, немале каде да се обратат и обично биле осудувани.

Денес проблемите со менталното здравје не се толку голема стигма и луѓето послободно зборуваат за нив.

Влакна на телото

Денес постојат безброј начини да ги отстранете влакната од телото – депилатор, брич, восок…

Но, нашите баби не биле преоптоварени со овој детаљ.

Всушност, ако погледнете стари фотки од холивудски актерки, ќе забележите дека неретко и тие ги игнорирале влакната на телото.

Совршено тело

Нашите баби дефинитивно имале поактивен живот од нашиот.

Ретки биле оние кои минувале осум, па и повеќе часа во канцеларија и/или пред компјутер.

Притоа, немале многу преработена храна како ние денес, што значи главно се хранеле поздраво.

Поради сето ова, тие поретко имале проблеми со прекумерна тежина, но дефинитивно не се оптоварувале ако имаат стомаче, целулит и слично.

Блескаво бели заби

Избелувањето на забите, па и ставањето порцелански заби, е нешто што го прават и многу млади луѓе, кои имаат природно убави заби.

Иако е добро тоа што денес свесноста за оралната хигиена е на повисоко ниво, се чини дека стануваме опседнати со многу бели заби.

Нашите баби, од друга страна, го немале овој комплекс.

Совршен педикир и маникир

Дури и девојките кои не одат во салони и не сакаат лакови за нокти, сепак се грижат ноктите да им се постојано уредни или, во најмала рака, користат безбоен лак.

Ова е уште еден стандард за убавина со кој нашите баби не биле опседнати.

Салоните за нокти не постоеле кога нашите баби биле млади, а не ни имале многу продукти за самите да прават маникир и педикир.

Спирова С. | Црнобело