Победникот не освојува со сила, освојува со ум!

Зарем си победник ако удриш шамар, можеби тупаница, пролееш крв или издвоиш победа, освоиш тврдина на нечесен начин?

Потсети се во книгата по Историја од која си учел дека таквите победи се краткотрајни, таквите тврдини се урнати бидејќи се градени од нечии рушевини.

Шамарот, тупаницата и крвта која си ја пролеал кога тогаш ќе ти се вратат назад како бумеранг и ќе те удрат силно во чело, ќе те турнат на земја, повторно ќе паднеш на глава.

Ќе го поматиш умот, доколку го имаш, но не грижи се, сигурно го немаш кога освојуваш со сила.

Се имаш ли запрашано што сè човек може да направи со својот ум, колку тој ум е посилен од силата, сечија?

Многу, може да направи се е одговорот, а силата за час, два те изневерува и те остава на пола пат, бидејќи не е реално оружје кое можеш да го користиш.

Мозокот е реално оружје кое го користиш или не го користиш, нели?

Да не би го имал, би бил ист како мравките, ситен, безгласен инсект кој каса доколку го стиснеш во рака.

Не биди инсект, биди човек, не касај со заби, касај со зборови, само така ќе го собориш противникот навистина.

Не заборавај само да си го надградиш вокабуларот за да можеш совршено да склопиш реченица бидејќи никој нема да ја склопи реченицата што лежи во тебе, освен ти самиот.

Ако не знаеш како, тогаш секогаш ќе останеш губитник, бидејќи победникот не освојува со сила и заби, освојува со ум и дипломатски зборови.

Таквите освоени тврдини никогаш не се рушат бидејќи се изградени од камења кои биле фрлани кон победникот.

Бидете победници, кога ќе ве нападнат со камења, наместо да ги враќате во главата на противникот, изградете тврдина околу себе и покажете му дека неговите камења ви помогнале да го победите!