Зошто е важно да се поставуваат личните граници во односите со луѓето?

Личните граници се она што не дефинира во односите со другите луѓе. Границите се начинот на кој им кажуваме на другите луѓе дека се почитуваме, но исто така и дека заслужуваме и бараме почит.

Пред сè, важно е да разберете дека секој има право да ги постави границите, да се заштити и да се брани. Ние првите треба да имаме здрав однос со себеси и со нашето достоинство. Поставувањето на границите е значаен чекор во учењето да се сакаме. Утврдувањето на границите не е чин на себичност, туку чин на самодоверба.

Целта на овие граници е да се заштитиме себеси на физичко, емоционално и ментално ниво и да се грижиме за себе. На овој начин го чуваме нашиот интегритет и го контролираме нашиот живот. Личните граници служат да ги научиме луѓето кои сме ние и како сакаме да се однесуваат кон нас.

Зошто често немаме граници или зошто им дозволуваме на другите да ги скршат? Причината е стравот. Страв да кажеме "не", да бидеме отфрлени и напуштени ако се спротивставуваме и сл. Исто така, во прашање може да биде и страв од конфликти.

Како честа причина се јавува и вината. Нејзиниот извор можат да бидат разни работи, но она што на сите ни се има случено многу пати во животот е чувство дека не сме доволно добри.

Лошите граници или нивниот недостаток им дозволува на луѓето да влегуваат во нашиот живот, без разлика дали се посакувани или не, и да прават со нас што сакаат. На тој начин можеме да влеземе во ситуација во која тешко ќе ги одвојуваме нашите желби и емоции од туѓите. Поради ова често се чувствуваме одговорни за емоциите на другите луѓе и зависиме од нивните мислења. Ова звучи како добар рецепт за нездрави односи, нели?

Како да поставите здрави граници? Она по што треба да се стремите се силни, а не нефлексибилни или непостоечки граници.Треба да знаете кога да кажете “НЕ“ за да го заштитите вашето битие и вашата благосостојба, без да чувствувате вина за тоа.

Границите никогаш не треба да ги поставувате од гнев или лутина, туку во состојба на смиреност. Кога ќе размислите што сакате да постигнете и кои граници треба да ги поставите, ќе добиете позитивни ефекти.

Доколку некоја граница не произведува добри резултати не е важно. Тоа значи дека не е за вас. Се обидовте, а ако не функционира треба да пронајдете начин на кој ќе ја прилагодите границата. Поставување на корисни граници е учење, процес. Потребни се време и искуство.

Границите кои ќе ги одредите треба да бидат во согласност со вашите убедувања, желби и чувства. Не се грижете за тоа како другите луѓе ќе реагираат на нив. Тие постојат за вас и никому не треба да му се извинувате за нив. И не заборавајте, здравите граници водат кон здравите односи.

Ашера | Црнобело