Цикада 3301 - најголемиот заговор или најголема измама на интернет?

Цикада 3301 е една од најголемите мистерии на нашето време. Mодерна потрага по Светиот Грал. Многумина имаат слушнато за нив, а знаеме дека со загатки и кодирани пораки ги регрутираат своите членови. Зошто? 

Многу теоретичари на заговор тешко се справуваат со ова прашање. Дали Цикада 3301 е трик за вработување од страна на некоја тајна служба или пак детска шега?

Оваа мистериозна интернет организација во ниту еден момент нема објавено со што се занимава и зошто има потреба да регрутира луѓе. Што се крие зад името Цикада 3301?

Приказната на Цикада 3301 започнува на 04.01.2012 година со необична порака придружена со слика во која пишувало: „Здраво. Бараме многу интелигентни личности. За да ги пронајдеме создадовме тест. Во оваа слика постои скриена порака. Кога ќе ја најдете, таа ќе ве однесе на патот кон нас. Со нетрпение очекуваме да се сретнеме со луѓето кои ќе успеат да стигнат до крајот. Со среќа. 3301.“

Ова беше само прва загатка во серија тестови кои ги привлекоа најдобрите интернет дешифрири, како и сите љубоптни луѓе.

По решавањето на оваа дигитална стеганографска загатка со помош на т.н „Цезаров код", се добиваше веб-адреса на која стоеше слика од патка со порака: „Упс! Само мамки на овој пат. Изгледа дека не знаеш како да ја добиеш пораката."

Во овој момент на многумина им стана јасно дека ова е малку покомплицирана мистерија, по што започна обидот да се открие најголемата тајна на интернетот. Кој се крие зад Цикада 3301?

Следниот траг беше пронајден на еден од форумите на популарната страница „Reddit“, а се состоеше од серија реченици со чудни симболи, кои се покажаа како Мајанско писмо. Во тоа време почнаа да се појавуваат симболи на штурци, чиј животен циклус трае од 13 до 17 години.

Штурците наскоро станаа симбол на оваа мистерија, а со нив се појавува и името, Цикада.

Играта продолжи проследена со загатки со ранохристијански ракописи, старо-бретонска поезија, сајбер-панк приказни, хексадецимални карактери и сл. Наскоро е откриен и телефонски број од Тексас чија автоматска секретарка обезбеди бројни нови броеви и 14 GPS-локации ширум светот, од Сиднеј до Варшава и Калифорнија.

Неколку среќни луѓе успеале да ја пронајдат бараната адреса, но наместо награда ги пречека уште една порака: „Ги сакаме само најдобрите, а не следбениците".

04.01.2013 година се појавува друга слика со порака: „Здраво уште еднаш. Нашата потрага по интелигентните поединци продолжува."

Потоа се појавуваат нови загатки во облик на поезија, нејасни и окултни списи, аудио снимки, антички хебрејски кодови и англосаксонски руни.

Потоа крај. Никој немаше идеја што се случи. Се мислеше дека се работи за форма на генијален маркетинг за нов филм, автомобил или банка. Некои луѓе тврделе дека се работи за таен натпревар и регрутирање спроведено од страна на ЦИА, НСА или други тајни агенции.

Постои дури и признание на еден од „поранешните членови на Цикада 3301“, кој тврди дека се работи за левичарска верска секта подготвена за трансформација на општеството.

Мистеријата на Цикада 3301 сé уште не е решена.

Ашера | Црнобело