Неверојатни работи што мозокот ги прави без наша помош

Го менува помнењето

Дали мислите дека кога еднаш ќе ви се случи нешто, засекогаш ќе го помните точно како што се случило? Но, изгледа дека ова не е точно.

Едно истражување, спроведено од Елизабет Лофтус и Џон Палмер, покажало дека нашиот мозок може да измени некое сеќавање доколку добил нови информации за настанот. Овие нови информации стануваат дел од оригиналното сеќавање, па на некој начин го прават лажно.

Одржување рамнотежа

Сигурно додека одите не размислувате за тоа. Но знаете ли колку работа има мозокот само за да одржиме рамнотежа?

За да го постигне ова, мозокот користи информации од очите, мускулите, зглобовите и вестибуларниот систем.

Сè што ќе видиме и секое движење што ќе го направиме му помага на мозокот да процени каде се наоѓаме и што има околу нас, за полесно да се движиме низ просторот.

Кивање

Кивањето можат да го предизвикаат алергиите и стимулансите кои предизвикуваат чешање. Сепак, најчесто не сме ни свесни дека во носот имаме нешто што ни пречи, сè додека не кивнеме.

Стимулацијата на нервните завршетоци во носот активира рефлексен одговор во мозокот, па кивнуваме.

Тресење

На сите ни е познато тресењето кога ни студи, но што го предизвикуваат ова?

И тресењето е рефлекс кој постои за наша заштита. Кога рецепторите во нашата кожа ќе почувствуваат дека температурата е ниска, нервниот систем го „известува“ хипоталамусот за ова.

Тогаш хипоталамусот им дава сигнал на мускулите за брза контракција, што ние ја чувствуваме како тресење. Ова тресење го загрева нашето тело и е надвор од наша контрола.

Смеење

Дали ви се случило да ве фати смеа во навистина непогодна ситуација? И за ова е виновен вашиот мозок.

Авторите на едно истражување од 1998-ма година сметаат дека смеењето е поттикнато од разни делови од мозокот, од кои секој е одговорен за разни искуства.

Постои емотивна реакција, когнитивен процес на разбирање зошто нешто е смешно и, на крај, неконтролирана реакција која вклучува мрдање на мускулите на лицето и формирање насмевка.

Откако ќе сфатиме дека нешто ни е смешно, мозокот предизвикува физичка реакција која понекогаш е навистина тешко да се контролира.

Спирова С. | Црнобело