Како изгледа животот на жените кои се во брак со повеќе од еден маж?

Раџо Верма е сопруга на пет браќа. Нејзиното огромно семејство живее во градот Дерадун во северна Индија. Раџо има и син, но никој не знае кој од браќата е неговиот биолошки татко.

Овој вид полигамија постои и денес и според некои истражувања, постојат околу 50 заедници во Непал, Тибет, Кина и Индија кои сѐ уште го практикуваат.

Па како изгледа животот во полиандрија, односно семејство со една жена и неколку сопрузи?

Кој е глава на семејството?

Сигурно досега имате слушнато за полигамија, брачна врска на една личност со повеќе сопрузи или сопруги. Во случај кога жената има повеќе сопрузи, станува збор за полиандрија.

Во овие случаи можеби најинтересно е што, најчесто, сопрузите на жената се браќа. Најстариот брат е и глава на семејството и тој ја одбира сопругата за него и за браќата.

Тој има и друга опција – да земе втора, па дури и трета жена.

Истовремено, најстариот брат се смета за татко на сите деца во семејството, без разлика кој ги зачнал. Децата им се обраќаат на другите мажи со „чичко“, дури и ако им се биолошки татковци.

Од каде потекнува полиандријата?

Никој не знае со сигурност од каде потекнува полиандријата.

Научниците сметаат дека најверојатно нејзината појава е поради економски причини. Односно, со создавање едно семејство, браќата не мора да ја делат земјата што ја наследиле од родителите.

Ова било одлично за луѓето кои живееле во Тибет или на Хималаите, бидејќи земјиштето им е од голема важност. Во Индија, пак, ова било одлично решение за оние кои страдале од пренаселеност.

Дали е легално?

Иако некои луѓе одбираат ваков на чин на живот, полигамните бракови не се легализирани насекаде ширум светот.

Истовремено, на некои места, како руралните средини на Тибет, тие поминуваат неказнето.

Семејство

Полиандријата постои со векови. Ова значи дека родителите, дедовците и пра-дедовците на овие луѓе живееле на истиот начин.

Жената најчесто има 2 до 5 сопрузи и сите треба да имаат барем 18 години. Ако во семејството има браќа помали од 18 години, штом ќе станат полнолетни, и тие ќе се венчаат со истата жена.

Овие луѓе се далеку од богати и, најчесто, целото семејство живее во една соба.

Кога мажите одат на работа, жената готви, чисти и се грижи за децата.

Заедници и соседства

Овие семејства најчесто живеат во заедници со 15-тина соседи. Често комуницираат и секогаш си помагаат едни со други.

Сепак, секое семејство е независно, си поставува свои правила и има свој распоред.

Денес постојат и „нетрадиционални“ вакви семејства. На пример, жената одлучува да заработува пари, а мажите да се грижат за домот и децата.

Спирова С. | Црнобело