Одрони, мала видливост, несовесни возачи - 10-те најопасни патишта ширум светот

Преминот Zoji La, Индија

Овој пат се наоѓа на Хималаите, на околу 8.000 метри надморска височина. Патот не е асфалтиран, што претставува голем проблем во постудените месеци кога има дожд или снег.

Автопатот Karakoram што ги поврзува Кина и Пакистан

Ова е највисокиот асфалтиран пат во светот и се наоѓа на 4.600 метри надморска височина. Но, асфалтот не го прави побезбеден од другите патишта на листава.

За време на изградбата на автопатот загинале дури 82 градежници, најмногу поради одроните кои претставуваат опасност и денес. На патот имаат настанато и многу сообраќајки.

Наводно, постоеле планови за проширување на автопатот од 9,7 на барем 20 метри, но властите биле загрижени дека со ова само ќе се зголеми бројот на возила по што ќе се случуваат уште повеќе несреќи.

Canning Stock Route, Австралија

За разлика од повеќето патишта на листата, овој автопат не се наоѓа на планина, но е многу долг и се смета за еден од најизолираните. Од почеток до крај, патот е долг околу 1.800 километри и ќе ви требаат недела-две за да го извозите цел.

На патот има многу прашина бидејќи не е асфалтиран, а во летните месеци е речиси неподнослив поради високите температури.

Властите препорачуваат сите кои планираат да го возат патот со себе задолжително да понесат повеќе храна и вода.

Skippers Canyon Road, Нов Зеланд

Овој пат е толку опасен, што осигурителните компании во Нов Зеланд не ги покриваат несреќите што настанале на него.

Патот е екстремно тесен и ако случајно наидете на возило кое доаѓа од другата страна, можно е да треба да враќате рикверц и до 3 километри пред да најдете место да свртите или да се разминете.

Патот е направен пред околу 140 години од страна на рудари, без речиси никаква опрема освен дупчалки и динамит.

Tizi-n-Test, Мароко

Патот се наоѓа на планината Атлас во Мароко и нема никаква ограда што би ве заштитила од пад. Покрај многуте кривини и височината, голем проблем претставуваат и локалните жители кои возат пребрзо по патот.

Во зимските месеци, пак, речиси секојдневно има одрони и лавини.

Спирова С. | Црнобело