Во Јапонија се чисти домот, во Италија се фрлаат стари предмети од прозорец – Невообичаени традиции за Нова година во светот

Во Јапонија пред доаѓањето на Нова година семејството се вклучува во ритуално чистење на домот, во Данска се кршат чинии од вратите на домовите на пријателите, а во Бразил сите носат бело. Како се слават новогодишните празници во светот?

Најголем дел од луѓето низ светот Нова година ја слават на 31-ви декември. Овој ден најчесто подразбира забави, собири со по некоја пијалак, вкусна храна, но и давање збор дека ќе промените некои работи во својот живот, а најчесто до дадениот збор се држиме до февруари.

Сепак, голем број земји во светот имаат свои уникатни традиции за Новата година.

Во продолжение погледнете некои интересни факти за тоа кои се познатите ритуали за новогодишната вечер во светот:

Фрлање стари предмети од прозорец

Во делови од Италија (како Рим и Неапол) луѓето ја пречекуваат новата година така што исфрлаат преку прозорецот стари предмети (најчесто садови).

Овој ритуал го симболизира ослободувањето од непотребното и старото за да се направи место за нов почеток. 

Почнете ја годината со бањање во ледена вода

На полуостровот Кони Ајланд во Њујорк постои традиција годината да се започне со бањање во ледените води на Атлантскиот Океан.

Овој ритуал е познат како Polar Bear Plunge, а најчесто учесниците го користат овој настан за да соберат финансии за непрофитни организации.

Грозје на полноќ

Во Шпанија постои традиција и суеверие според кое точно на полноќ треба да изедете 12 зрнца грозје за среќни 12 месеци во следната година. 

На гости кај пријателите

Во делови од Шкотска веднаш по отчукувањето на полноќ на Нова година постои традиција според која треба да одите во домот на пријателот или на соседот.

Кога одите со вас треба да понесете и симболичен подарок што ќе му донесе среќа на домаќинот. 

Скршете чинија од вратата на домот на пријателите

Во Данска постои традиција според која треба да се скрши чинија од вратата на пријателите.

Доколку најдете голем куп скршени чинии утрото на 1-ви јануари тоа значи дека сте среќен човек и имате многу пријатели.

Генералка на Нова година

Во јапонската традиција постои ритуално чистење во последните неколку часови од старата година, наречено Oosouji, според кое сите членови на семејството се вклучуваат во генерално чистење на домот.

По ова се служи традиционалното јапонско јадење со риба, мешунки и јајца и новогодишни тестенини. Долгите тестенини симболизираат долг живот.

Бела облека

Во Бразил традиционално за Нова година се носи бела облека. Постои верување дека белата облека ќе им донесе добра среќа и мир.

Обесете кромид пред врата

На грчкиот остров Крит кромидот е симбол за добра среќа и плодност затоа што расте и кога никој не му обрнува внимание.

На Нова година на овој остров постои традиција да се обесуваат врзопи со кромид пред влезните врати за да се повика благосостојбата во домовите.

Фрлање кофа со вода

Во Порторико постои традиција на фрлање кофа вода од прозорецот.

Се верува дека на овој начин ќе се избркаат лошите духови од домот, но може да биде мошне непријатно за луѓето што ќе се најдат под прозорецот. Во Порторико исто така фрлаат шеќер пред домовите за да ја повикаат добрата среќа.

Бакнеж за Нова година

Традицијата за бакнеж за Нова година најверојатно потекнува од германскиот и од англискиот фолклор, каде се верувало дека првата личност што ќе ја сретнете ви ја одредува среќата во следната година.

Со текот на времето луѓето решиле да бидат пребирливи и сега ги бакнуваат луѓето што им се допаѓаат за Нова година или партнерите/децата.

Б. С. Б. | Црнобело

Фото: pexels.com/freepik.com