Си прават венци од свежо цвеќе и гордо ги носат – Како изгледаат мажите од племето Кахтан?

Мажите од племето Кахтан (Qahtan) во Саудиска Арабија секојдневно прават венци од свежо цвеќе кои потоа ги носат на главите. Некои од нив си ја фарбаат и брадата со к’на за да ги истакнат живописните бои на цветовите.

Во Саудиска Арабија постои племе каде што мажите носат венци од свежи цветови, поради што со текот на времето станале познати како „мажи на цвеќето“ (flower men).

Наводно, во областа каде што живее племето виреат над 2.000 разни видови цвеќиња, а голем дел можете да најдете по локалните пазари.

Племето Кахтан живее во југозападниот дел на земјата повеќе од 2.000 години, а се верува дека и традицијата со венците од цвеќе е стара приближно толку.

Венците се изработуваат секое утро на локалните пазарчиња – некогаш од страна на продавачите, а некогаш мажите сами си ги избираат цветовите ако сакаат поуникатен изглед. Покрај цветови, тие користат и тревки како босилек.

Некои мажи, пак, си ја фарбаат брадата со к’на бидејќи сметаат дека така изгледа подобро во комбинација со венецот.

Имено, венците се веќе препознатливи за областа и се популарна туристичка атракција. Се продаваат по цена од неколку евра, а еден венец може да се носи два дена, односно додека цветовите да се исушат.

Мажите внимателно ги одбираат боите на цветовите со цел да се совпаѓаат со традиционалната облека на нивното племе.

Интересно е што овие венци не се носат само од естетски причини. Народните лекови од разни растенија се мошне популарни во оваа област, па тие носат и „лековити венци“ за кои се верува дека можат да ја излечат главоболката.

Наводно, и жените од племето некогаш носат вакви венци, но племето не дозволува да се фотографираат.

И машките деца гордо ги носат венците од цвеќе, а локалците имаат и друга забавна традиција – штом ќе ги посети некој странец, веднаш му подаруваат ваков венец.

Цветните мотиви доминираат и во домовите на ова племе. Тие ги украсуваат ѕидовите со стил на цртање познат како Al Qatt Al Asiri кој од 2017 година е заштитен од УНЕСКО. Овие мурали обично ги изработуваат жените.

Спирова С. | Црнобело